बीड : वाळू वाहतूक करणाऱ्या हायवा वाहनांवर कारवाई न करण्यासाठी १ लाख २० हजार रुपयांची लाच मागून तडजोडीनंतर ७० हजार रुपये स्वीकारणाऱ्या ग्राम महसूल अधिकाऱ्यास (तलाठी) लाचलुचपत प्रतिबंधक विभागाच्या पथकाने रंगेहात पकडले. ही कारवाई १८ ऑगस्ट २०२६ रोजी गेवराई येथे करण्यात आली.
लाचलुचपत प्रतिबंधक विभाग, छत्रपती संभाजीनगर घटकाकडे ३५ वर्षीय शेतकऱ्याने याबाबत लेखी तक्रार दिली होती. तक्रारदार वाळू वाहतूक करणाऱ्या हायवा वाहनांवर कारवाई होऊ नये यासाठी तलाठी विलास राजेंद्र मोराळे (वय ४७) यांच्याकडून लाचेची मागणी होत असल्याचे तक्रारीत नमूद करण्यात आले होते. मोराळे हे ग्राम महसूल अधिकारी (तलाठी), सजा खामगाव, तालुका गेवराई, जिल्हा बीड येथे कार्यरत आहेत.
तक्रारीच्या अनुषंगाने १८ ऑगस्ट रोजी लाचलुचपत प्रतिबंधक विभागाने तक्रारीची पडताळणी केली. यावेळी तक्रारदाराला गेवराई येथील खासगी कार्यालयात बोलावून वाळू वाहतूक करणाऱ्या हायवा वाहनांवर कारवाई न करण्यासाठी आरोपी लोकसेवकाने १ लाख २० हजार रुपयांची लाच मागितल्याचे निष्पन्न झाले. त्यानंतर तडजोडीअंती ७० हजार रुपये स्वीकारण्याचे पंचांसमक्ष मान्य करण्यात आले.
त्यानंतर रचण्यात आलेल्या सापळ्यात तक्रारदार १८ ऑगस्ट रोजी कोल्हेर रोड, गेवराई येथील खासगी कार्यालयात गेला. यावेळी आरोपी तलाठी विलास मोराळे यांनी पंचांसमक्ष ७० हजार रुपयांची लाच स्वीकारताच लाचलुचपत प्रतिबंधक विभागाच्या पथकाने त्यांना ताब्यात घेतले. त्यानंतर आरोपीच्या घराची झडती घेण्याची प्रक्रिया सुरू करण्यात आली.
या प्रकरणी गेवराई पोलीस ठाणे, जिल्हा बीड येथे भ्रष्टाचार प्रतिबंधक अधिनियम १९८८ मधील कलम ७ अन्वये गुन्हा दाखल करण्याची प्रक्रिया सुरू आहे. आरोपीला १८ ऑगस्ट रोजी दुपारी २.५० वाजता ताब्यात घेण्यात आले.
ही सापळा कारवाई पोलीस उपअधीक्षक बाळासाहेब शिंदे यांच्या नेतृत्वाखाली करण्यात आली. सहाय्यक सापळा अधिकारी म्हणून पोलीस निरीक्षक भास्कर नवले यांनी काम पाहिले. पर्यवेक्षक अधिकारी म्हणून पोलीस उपअधीक्षक प्रशांत पवार यांनी कारवाईवर देखरेख केली. सापळा पथकात पोलीस अंमलदार अनवेज शेख, पोलीस अंमलदार प्रकाश डोंगरदिवे आणि चालक पोलीस अंमलदार राम ताठे यांचा सहभाग होता.
या कारवाईसाठी लाचलुचपत प्रतिबंधक विभागाच्या छत्रपती संभाजीनगर परिक्षेत्राच्या पोलीस अधीक्षक माधुरी केदार कांगणे तसेच अपर पोलीस अधीक्षक शशिकांत सिंगारे यांचे मार्गदर्शन लाभले.
लाचलुचपत प्रतिबंधक विभागाने नागरिकांना आवाहन केले आहे की, कोणताही लोकसेवक शासकीय कामासाठी लाच मागत असल्यास नागरिकांनी त्याबाबत तातडीने लाचलुचपत प्रतिबंधक विभागाशी संपर्क साधावा. छत्रपती संभाजीनगर येथील घटक कार्यालयाशी ०२४०-२३४४०५० या क्रमांकावर, तसेच टोल फ्री क्रमांक १०६४ आणि व्हॉट्सअॅप क्रमांक ७७२०८९१०६४ वर संपर्क साधता येईल.
