वीजचोरीच्या कारवाईची भीती दाखवून पैशांची मागणी; शिवाजीनगर परिसरातील घटनेने खळबळ
छत्रपती संभाजीनगर : वीजबिलातील तफावत आणि वीजचोरीच्या कारवाईची भीती दाखवून तक्रारदार महिलेकडून २५ हजार रुपयांची लाच स्वीकारल्याच्या आरोपावरून महावितरणच्या कंत्राटी इलेक्ट्रिशियनला लाचलुचपत प्रतिबंधक विभागाने (एसीबी) रंगेहाथ पकडले. विष्णू सीताराम खरात (वय ५०, रा. मिसारवाडी) असे संशयिताचे नाव असून, या कारवाईमुळे महावितरणच्या वर्तुळात खळबळ उडाली आहे.
कारवाईची भीती दाखवून लाचेची मागणी
मिळालेल्या माहितीनुसार, २३ ऑक्टोबर रोजी तक्रारदार महिलेच्या घरी महावितरणच्या पथकाने वीज मीटरची तपासणी केली होती. यावेळी वीजबिल कमी आल्याचे कारण पुढे करत संबंधित महिलेवर वीजचोरीची कारवाई होऊ शकते आणि त्यासाठी ६० ते ७० हजार रुपयांचा दंड भरावा लागू शकतो, अशी भीती दाखवण्यात आल्याचा आरोप आहे.
ही कारवाई टाळण्यासाठी वरिष्ठ अधिकाऱ्यांशी बोलून प्रकरण मिटवून देण्याच्या मोबदल्यात ३० हजार रुपयांची मागणी करण्यात आल्याचे तक्रारीत नमूद आहे. यानंतर संबंधित महिलेने लाचलुचपत प्रतिबंधक विभागाकडे धाव घेतली.
तडजोडीनंतर २५ हजार रुपये स्वीकारले
तक्रारीच्या अनुषंगाने एसीबीच्या पथकाने पडताळणी केली. त्यानंतर तडजोडीत २५ हजार रुपये स्वीकारण्याचे ठरल्याची माहिती समोर आली. सोमवारी दुपारी सापळा रचण्यात आला. यावेळी महिलेकडून लाचेची रक्कम स्वीकारताना खरात याला पथकाने पकडल्याचे वृत्त आहे.
कठोर कारवाईची मागणी
या घटनेमुळे वीजग्राहकांकडून कामाच्या मोबदल्यात अवैध पैशांची मागणी करणाऱ्यांवर कठोर कारवाई करण्याची मागणी होत आहे. संबंधित संशयित गेल्या दहा वर्षांपासून महावितरणमध्ये कंत्राटी पद्धतीने काम करत असल्याची माहिती आहे. त्यामुळे या प्रकरणाचा सखोल तपास करून इतर संबंधितांची भूमिकाही तपासण्याची गरज व्यक्त केली जात आहे.
सदर कारवाई पोलीस उपअधीक्षक विशाल बहातरे, पोलीस निरीक्षक शांतिलाल चव्हाण, अंमलदार रवींद्र काळे, अशोक नागरगोजे आणि चांगदेव बागुल यांच्या पथकाने केली.
प्रकरणाचा पुढील तपास सुरू असून, संबंधित आरोपांची अंतिम सत्यता न्यायालयीन प्रक्रियेत निश्चित होईल.
