छत्रपती संभाजीनगर | प्रतिनिधी
वाहनावर RTO ई-चलान बाकी असल्याचे सांगत WhatsApp आणि SMS द्वारे नागरिकांना बनावट मेसेज पाठवून सायबर फसवणूक करण्याचा प्रकार पुन्हा चर्चेत आला आहे. या मेसेजसोबत ‘RTO E-Challan.apk’, ‘RTO Traffic Challan.apk’ अशा नावाने फाईल किंवा लिंक पाठवली जात असून, ती अधिकृत कागदपत्र किंवा PDF असल्याचे भासवले जाते. प्रत्यक्षात अशा APK फाईलमध्ये घातक मालवेअर असण्याची शक्यता असून, ती इन्स्टॉल केल्यास मोबाईलमधील संवेदनशील माहिती, OTP आणि आर्थिक व्यवहारांना धोका निर्माण होऊ शकतो.
सायबर तज्ज्ञांच्या मते, वाहन क्रमांक किंवा चालानाची माहिती खरी वाटत असली तरी अशा अनोळखी लिंकवर क्लिक करू नये आणि WhatsApp किंवा SMS द्वारे आलेली कोणतीही APK फाईल इन्स्टॉल करू नये. वाहनावर खरोखर ई-चलान आहे का, हे तपासण्यासाठी नागरिकांनी केवळ अधिकृत सरकारी ई-चलान प्रणालीवरूनच पडताळणी करावी.
चुकून APK फाईल इन्स्टॉल केली असल्यास तातडीने मोबाईलचे इंटरनेट बंद करून बँकिंग व इतर महत्त्वाच्या खात्यांचे पासवर्ड बदलणे, संशयास्पद अॅप हटवणे आणि आर्थिक फसवणूक झाल्यास त्वरित सायबर गुन्हे विभागाशी संपर्क साधणे आवश्यक आहे.
नागरिकांनी लक्षात ठेवावे :
– अनोळखी RTO चालान लिंकवर क्लिक करू नका.
– WhatsApp/SMS मधून आलेली APK फाईल इन्स्टॉल करू नका.
– चालानाची माहिती अधिकृत सरकारी पोर्टलवरच तपासा.
– संशयास्पद मेसेज पुढे फॉरवर्ड करण्याऐवजी डिलीट करा.
– सावधानता हाच सायबर फसवणुकीपासून बचावाचा सर्वात प्रभावी मार्ग आहे.
