पर्यावरण दिनानिमित्त केवळ फोटोसेशन नव्हे, झाडे जगवण्यावर भर द्या; कौशल्य सेवा फाउंडेशनची प्रशासनाला साद

छत्रपती संभाजीनगर 5जून | (महाराष्ट्र न्यूज टाइम्स प्रतिनिधी)
पर्यावरण दिनानिमित्त शहरातील विविध सामाजिक संस्था, शासकीय अधिकारी, लोकप्रतिनिधी आणि राजकीय मंडळींनी वृक्षारोपणाचे उपक्रम राबवून त्याचे फोटो सोशल मीडियावर व वृत्तपत्रांमधून प्रसिद्ध केले. मात्र, प्रत्यक्षात शहरातील वाढते प्रदूषण, घटणारी हरित पट्टी आणि नष्ट होत चाललेली जुनी झाडे ही चिंतेची बाब असल्याचे मत कौशल्य सेवा फाउंडेशन यांनी व्यक्त केले आहे.
फाउंडेशनच्या वतीने सांगण्यात आले की, “फक्त झाडे लावणे पुरेसे नाही, तर ती जगवणे अधिक महत्त्वाचे आहे. दहा झाडे लावून ती वाळण्यापेक्षा एक झाड लावून ते मोठे करणे अधिक गरजेचे आहे.” प्रशासनाकडून वृक्षारोपणाचे अनेक उपक्रम राबवले जात असले तरी झाडांच्या संवर्धनासाठी आणि संगोपनासाठी अधिक प्रभावी यंत्रणा उभारण्याची गरज असल्याचे त्यांनी नमूद केले.
शहरातील रस्ते रुंदीकरण, विविध विकासकामे आणि आधुनिकीकरणाच्या नावाखाली अनेक दशकांपासून उभी असलेली वड, पिंपळ आणि इतर मोठी झाडे तोडली जात आहेत. या झाडांमुळे नागरिकांना सावली मिळत होती, पक्ष्यांना निवारा मिळत होता तसेच प्रदूषण नियंत्रणात ठेवण्यास मदत होत होती. मात्र, त्या बदल्यात लावण्यात येणारी नवीन झाडे कितपत जगतात आणि त्यांचे संगोपन कसे केले जाते, याबाबत नागरिकांमध्ये प्रश्नचिन्ह निर्माण झाले आहे.
कौशल्य सेवा फाउंडेशनने प्रशासनाला आवाहन केले आहे की, विकासकामांचे नियोजन करताना स्थानिक नागरिक, पर्यावरणप्रेमी संस्था, स्वयंसेवी संघटना (NGO) आणि तरुणांना विश्वासात घ्यावे. एखादे मैदान, रस्ता किंवा अन्य विकास प्रकल्प राबविताना झाडतोडीचा निर्णय एकतर्फी न घेता पर्यावरणीय परिणामांचा विचार करावा आणि पर्यायी वृक्षलागवड व संवर्धनाची ठोस जबाबदारी निश्चित करावी.
“झाडे लावा, झाडे जगवा” हा संदेश केवळ घोषणांपुरता मर्यादित न राहता प्रत्यक्ष कृतीत उतरविण्याची वेळ आली आहे. वाढत्या प्रदूषणाच्या संकटातून शहराला बाहेर काढण्यासाठी प्रशासन, सामाजिक संस्था आणि नागरिक यांनी संयुक्तपणे प्रयत्न करण्याची गरज असल्याचे फाउंडेशनने म्हटले आहे.
पर्यावरण संवर्धनासाठी केवळ एका दिवसापुरते उपक्रम न राबवता वर्षभर सातत्याने प्रयत्न व्हावेत आणि शहराची हरित ओळख पुन्हा निर्माण करण्यासाठी ठोस पावले उचलावीत, अशी मागणी कौशल्य सेवा फाउंडेशन यांनी प्रशासनाकडे केली आहे.