मुंबई, दि. २ : मंत्रालयाजवळील प्रतिष्ठित एअर इंडिया इमारत आता अधिकृतपणे महाराष्ट्र शासनाच्या मालकीची झाली आहे. एअर इंडिया ॲसेट होल्डिंग कंपनी आणि राज्य शासनाच्या सार्वजनिक बांधकाम विभागामधील करारनाम्याचे हस्तांतरण आज मुख्यमंत्री देवेंद्र फडणवीस यांच्या प्रमुख उपस्थितीत पार पडले.
मंत्रिमंडळ बैठकीनंतर मंत्रालयातील मंत्रिमंडळ सभागृहात आयोजित कार्यक्रमात या महत्त्वपूर्ण व्यवहाराची प्रक्रिया पूर्ण करण्यात आली. यावेळी उपमुख्यमंत्री सुनेत्रा अजित पवार, पर्यटन मंत्री शंभूराज देसाई, सार्वजनिक बांधकाम मंत्री शिवेंद्रसिंहराजे भोसले, मुख्य सचिव राजेश अग्रवाल, सार्वजनिक बांधकाम विभागाचे अप्पर मुख्य सचिव मिलिंद म्हैसकर, मुंबई शहर जिल्हाधिकारी आंचल गोयल तसेच एअर इंडिया कंपनीचे वरिष्ठ अधिकारी उपस्थित होते.
राज्य शासनाने खरेदी केलेली ही इमारत दक्षिण मुंबईतील अत्यंत महत्त्वाच्या आणि मोक्याच्या ठिकाणी असून, भविष्यात विविध शासकीय कामकाजासाठी तिचा उपयोग होण्याची शक्यता आहे. मंत्रालय परिसरातील वाढत्या प्रशासकीय गरजा लक्षात घेता ही खरेदी महत्त्वपूर्ण मानली जात आहे.
या हस्तांतरणामुळे राज्य शासनाच्या पायाभूत सुविधांमध्ये भर पडणार असून, मंत्रालय परिसरातील शासकीय कार्यालयांच्या विस्तारासाठीही नवी संधी उपलब्ध होणार आहे.
