अमित शहा यांच्याबाबतच्या कथित विधानावरून दाखल झाला होता खटला; निकालानंतर काँग्रेस कार्यकर्त्यांचा जल्लोष
सुलतानपूर : भाजपचे ज्येष्ठ नेते अमित शहा यांच्याविषयी कथित आक्षेपार्ह विधान केल्याच्या आरोपाशी संबंधित मानहानीच्या प्रकरणात काँग्रेस नेते राहुल गांधी यांची सुलतानपूर येथील खासदार-आमदार विशेष न्यायालयाने सोमवारी निर्दोष मुक्तता केली. या प्रकरणामुळे राजकीय वर्तुळात चर्चेला पुन्हा उधाण आले आहे.
या प्रकरणाची सुरुवात ऑगस्ट २०१८ मध्ये झाली होती. भाजप नेते विजय मिश्रा यांनी राहुल गांधी यांच्याविरोधात न्यायालयात तक्रार दाखल केली होती. तक्रारीनुसार, ८ मे २०१८ रोजी बेंगळुरू येथे झालेल्या पत्रकार परिषदेत राहुल गांधी यांनी भाजपच्या तत्कालीन नेतृत्वावर टीका करताना पक्षाध्यक्षांवर हत्येचा आरोप असल्याचा उल्लेख केला होता. या विधानामुळे मानहानी झाल्याचा दावा तक्रारदाराने केला होता.
निकालानंतर कार्यकर्त्यांचा उत्साह
न्यायालयाने राहुल गांधी यांच्या बाजूने निकाल दिल्यानंतर न्यायालय परिसरात काँग्रेस कार्यकर्त्यांनी आनंद व्यक्त केला. ढोल-ताशांच्या गजरात नृत्य करत आणि घोषणाबाजी करत कार्यकर्त्यांनी जल्लोष साजरा केला. काही कार्यकर्त्यांनी फटाकेही फोडले.
दीर्घकाळ चर्चेत असलेल्या या प्रकरणातील न्यायालयीन निर्णयानंतर काँग्रेस समर्थकांमध्ये उत्साहाचे वातावरण पाहायला मिळाले.
