छत्रपती संभाजीनगर : गणेशोत्सवाच्या मिरवणुकीदरम्यान गुलाल उधळल्याच्या कारणावरून पोलिसांनी गणेशभक्तांवर लाठीचार्ज केल्याचा आरोप करण्यात आला आहे. या घटनेत रेवण सोनवणे हा तरुण जखमी झाल्याची माहिती समोर आली आहे.
मिळालेल्या माहितीनुसार, गणेशोत्सवाचा उत्साह सुरू असताना भाविकांकडून गुलाल उधळला जात होता. यावेळी एपीआय मनोज शिंदे यांनी गणेशभक्तांना मारहाण केल्याचा आरोप करण्यात आला आहे. घटनास्थळी सुरू असलेल्या प्रकारादरम्यान स्टेजवरून ‘मारू नका’ अशा सूचना दिल्या जात असल्याचे प्रत्यक्षदर्शींनी सांगितले. काही भाविकांनी हात जोडून विनंती करूनही मारहाण सुरूच राहिल्याचा आरोप करण्यात आला आहे.
या घटनेनंतर संतप्त गणेश मंडळांचे कार्यकर्ते आणि भाविकांनी सिटी चौक पोलीस ठाण्यात धाव घेतली. त्यांनी संबंधित पोलिस अधिकाऱ्यावर कारवाई करण्याची मागणी करत निषेध व्यक्त केला.
दरम्यान, या घटनेबाबत करण्यात आलेले आरोप, प्रत्यक्षदर्शींचे म्हणणे आणि पोलिस प्रशासनाची अधिकृत भूमिका याबाबत सविस्तर माहिती समोर येणे बाकी आहे. घटनेची चौकशी करून दोषींवर कारवाई करण्याची मागणी गणेशभक्तांकडून करण्यात येत आहे.
