छत्रपती संभाजीनगर : साई पार्क, म्हाडा कॉलनी, एन -7 सिडको येथील साई पार्क गणेश मंडळाने यंदा गणेशोत्सवाचे ३१वे वर्ष पूर्ण केले आहे. सन १९९५ मध्ये स्थापन झालेल्या या मंडळाची सुरुवात तीन दशकांपूर्वी लहान मुलांच्या सहभागातून झाली. त्यावेळी बालगोपाल म्हणून मंडळाशी जोडलेली मुले आज मोठी झाली असून, मंडळाची जबाबदारी समर्थपणे सांभाळत आहेत. काळानुसार मंडळाला नवे आणि आकर्षक स्वरूप देतानाच विविध उपक्रमांची भर घालण्याचे काम सातत्याने सुरू आहे.
मंडळाच्या स्थापनेपासूनच सामूहिक सहभाग आणि विविध सामाजिक-सांस्कृतिक उपक्रम हे प्रमुख वैशिष्ट्य राहिले आहे. दरवर्षी नवीन पदाधिकारी आणि कार्यकर्ते विविध जबाबदाऱ्या स्वीकारत असले, तरी ३१ वर्षांची ही परंपरा सर्वांच्या सामूहिक प्रयत्नांतून पुढे जात आहे.
गणेशोत्सवानिमित्त मंडळात लहान मुलांसाठी हस्ताक्षर व चित्रकला स्पर्धा, एक मिनिट शो, संगीत खुर्ची, डीजे नाईट, क्रिकेट लीग, व्हॉलीबॉल, फुटबॉल व कबड्डी स्पर्धा, सामूहिक अग्निहोत्र, होम मिनिस्टर, विविध वेशभूषा स्पर्धा, आनंदनगरी, महाआरती, मोठ्यांसाठी अंताक्षरी, महाप्रसाद, सत्यनारायण पूजा, बक्षीस वितरण आणि गणेश विसर्जन अशा विविध कार्यक्रमांचे आयोजन केले जाते.
विशेष म्हणजे, दरवर्षी उपक्रमांमध्ये नवनवीन कल्पनांची भर घालून गणेशोत्सव सर्व वयोगटांना सहभागी करून घेणारा आणि आनंददायी करण्याचा प्रयत्न केला जातो. त्यामुळे साई पार्क गणेश मंडळाचा उत्सव हा केवळ धार्मिक कार्यक्रम न राहता, परिसरातील नागरिकांना एकत्र आणणारा सामाजिक व सांस्कृतिक उपक्रम ठरत आहे.
या ३१ वर्षांच्या प्रवासाचे श्रेय कोणत्याही एका व्यक्तीला न देता, आजवर मंडळाशी जोडलेल्या सर्व पदाधिकारी, कार्यकर्ते, सदस्य, महिला, ज्येष्ठ नागरिक, बालगोपाल आणि साई पार्क परिसरातील नागरिकांच्या सामूहिक योगदानाला जाते. दरवर्षी जबाबदाऱ्यांमध्ये बदल होत असले तरी मंडळाची परंपरा, एकजूट आणि कार्याची भावना कायम राहिली आहे. साई पार्क परिवारातील महिला, ज्येष्ठ नागरिक, युवक, युवती आणि बालगोपाल अशा प्रत्येक घटकाचा मंडळाच्या उपक्रमांमध्ये अधिकाधिक सहभाग कसा वाढेल, त्याच्या कलागुणांना आणि क्षमतेला व्यासपीठ मिळाल्यास मंडळाला आणखी व्यापक आणि भव्य स्वरूप प्राप्त होऊ शकते.
३१ वर्षांची ही गौरवशाली परंपरा पुढे नेताना सामाजिक, सांस्कृतिक, क्रीडा आणि विधायक उपक्रमांच्या माध्यमातून साई पार्क गणेश मंडळाने छत्रपती संभाजीनगरच्या गणेशोत्सवात आपली वेगळी ओळख आणखी मजबूत करावी, तसेच पुढील पिढीलाही या परंपरेशी जोडावे, अशा मनःपूर्वक शुभेच्छा मंडळातील सर्व कार्यकर्ते व सदस्यांना देण्यात येत आहेत.
