बेगमपुरा परिसरात ९०० किलो गोमांस जप्त; एकाविरुद्ध गुन्हा दाखल

मनपाच्या कत्तलविरोधी पथकाची धडक कारवाई; बोलेरो पिकअप वाहनही जप्त
छत्रपती संभाजीनगर, २४ ऑगस्ट 🙁 महाराष्ट्र न्यूज टाईम प्रतिनिधी) छत्रपती संभाजीनगर महानगरपालिकेच्या अवैध कत्तलविरोधी पथकाने बेगमपुरा पोलिस ठाण्याच्या हद्दीतील कोहिनूर कॉलनी परिसरात धडक कारवाई करत सुमारे ९०० किलो गोमांस आणि बोलेरो पिकअप वाहन जप्त केले. या प्रकरणी एका संशयिताविरुद्ध बेगमपुरा पोलिस ठाण्यात गुन्हा दाखल करण्यात आला आहे.
महापालिका आयुक्तांच्या आदेशानुसार व अतिरिक्त आयुक्तांच्या मार्गदर्शनाखाली, तसेच पशुसंवर्धन विभागप्रमुखांच्या निर्देशानुसार ही कारवाई करण्यात आली. जप्त करण्यात आलेल्या गोमांसाची अंदाजे बाजारातील किंमत २ लाख ७० हजार रुपये असल्याची माहिती महापालिकेच्या पशुसंवर्धन विभागाने दिली.
२४ ऑगस्ट रोजी सकाळी सुमारे ८ वाजता मनपाचे अवैध कत्तलविरोधी पथक शासकीय वाहनाने शहरात गस्त घालत असताना कोहिनूर कॉलनी परिसरात एका संशयित बोलेरो पिकअप वाहनाची तपासणी करण्यात आली. तपासणीदरम्यान वाहनामध्ये अंदाजे ९०० किलो गोमांस आढळून आले.
या कारवाईत तोसिफ मुकीत मन्यार (वय २३, रा. देवगाव रंगारी, ता. कन्नड) याला ताब्यात घेण्यात आले. त्याच्याकडून सुमारे ९०० किलो गोमांस तसेच बोलेरो पिकअप वाहन जप्त करण्यात आले.
घटनास्थळी पंचनामा करून जप्त केलेल्या मांसाचे नमुने तपासणीसाठी सील करण्यात आले. मनपाच्या पशुधन पर्यवेक्षक अधिकाऱ्यांनी फिर्याद दिल्यानंतर आरोपीविरुद्ध बेगमपुरा पोलिस ठाण्यात महाराष्ट्र पशुसंरक्षण अधिनियम १९७६ मधील संबंधित कलमे तसेच भारतीय न्याय संहिता (BNS) २०२३ मधील कलम ३२५ अन्वये गुन्हा दाखल करण्यात आला आहे. पुढील तपास बेगमपुरा पोलिस करीत आहेत.
या कारवाईत मनपाचे पशुवैद्यकीय अधिकारी, अन्न सुरक्षा अधिकारी, पशुधन पर्यवेक्षक, पथकप्रमुख तसेच वाहन चालक व सुरक्षा रक्षकांनी सहभाग घेतला.
–महाराष्ट्र न्यूज टाइम्स