वृक्षारोपण, संवर्धन व पर्यावरण क्षेत्रातील अनुभवी व्यक्तींना संधी
४ सप्टेंबर २०२६ पर्यंत अर्ज सादर करण्याचे आवाहन
माहिती व जनसंपर्क विभाग
दि. २४ ऑगस्ट
छत्रपती संभाजीनगर महानगरपालिका स्तरावरील वृक्ष प्राधिकरण समितीचे पुनर्गठन करण्यात येणार असून, समितीवर नामनिर्देशित करण्यात येणाऱ्या तीन सदस्यांच्या नियुक्तीसाठी पात्र व्यक्तींकडून अर्ज मागविण्यात आले आहेत.
नागरी क्षेत्रातील वृक्षसंरक्षण व जतनासाठी महाराष्ट्र (नागरी क्षेत्र) झाडांचे संरक्षण व जतन अधिनियम, १९७५ तसेच महाराष्ट्र शासनाच्या दि. १६ जुलै २०२१ रोजीच्या अधिसूचनेनुसार ही प्रक्रिया राबविण्यात येत आहे.
शासनाद्वारे वेळोवेळी अधिसूचित करण्यात येणाऱ्या किमान कालावधीसाठी झाडांची लागवड, रोपण, जतन व संवर्धन यामध्ये अनुभव असलेल्या बिनसरकारी संघटनांसह सेवानिवृत्त शासकीय अधिकाऱ्यांपैकी तज्ज्ञ व्यक्तींची वृक्ष प्राधिकरण समितीवर नामनिर्देशित सदस्य म्हणून नियुक्ती करण्यात येणार आहे.
या करिता पुढील निकषानुसार
समितीच्या सदस्यपदासाठी अर्ज करणारी व्यक्ती कोणत्याही शासकीय, निमशासकीय किंवा स्थानिक स्वराज्य संस्थेतील पदावर कार्यरत नसावी. तसेच बिनसरकारी संस्थेच्या प्रतिनिधी म्हणून नियुक्ती होऊ इच्छिणाऱ्या व्यक्तीचे शासनाच्या सामाजिक वनीकरण विभागाकडे नोंदणीकृत बिनसरकारी संस्थेचे सक्रिय सदस्य असणे आवश्यक आहे.
कृषी, वन किंवा उद्यान विभागातील सेवानिवृत्त वर्ग-१ व वर्ग-२ अधिकाऱ्यांना प्राधान्य देण्यात येणार आहे. याशिवाय वृक्षारोपण, वृक्षसंवर्धन, पुनर्रोपण किंवा पर्यावरण संवर्धन क्षेत्रातील विशेष ज्ञान व किमान पाच वर्षांचा प्रत्यक्ष अनुभव असलेल्या व्यक्तींनाही अर्ज करता येणार आहे.
समितीच्या सदस्यांना कोणतेही मानधन अथवा भत्ता देय राहणार नसून, समितीचा कार्यकाळ महासभेचा कार्यकाळ असेपर्यंत राहणार आहे. तसेच समिती किंवा वृक्ष प्राधिकरणाच्या निर्णयाधीन बाबींमध्ये आयुक्त तथा अध्यक्ष, वृक्ष प्राधिकरण यांचा निर्णय अंतिम राहील.
४ सप्टेंबरपर्यंत अर्ज सादर करण्याचे आवाहन
वरील पात्रता धारण करणाऱ्या इच्छुक व्यक्तींनी दि. ४ सप्टेंबर २०२६ पर्यंत आपला सविस्तर अर्ज मुख्य उद्यान अधिकारी, सिद्धार्थ उद्यान, छत्रपती संभाजीनगर येथे सादर करावा. अर्जासोबत Curriculum Vitae (CV) व संबंधित कागदपत्रे जोडणे आवश्यक आहे.
प्राप्त अर्जांची छाननी करून वृक्ष प्राधिकरण समितीवर तीन सदस्य नामनिर्देशित/नियुक्त करण्याचा अधिकार महानगरपालिका आयुक्त तथा वृक्ष प्राधिकरण समितीचे अध्यक्ष यांच्याकडे राहणार आहे.
