ऑटोरिक्षासह इलेक्ट्रिक मोटार, वजनकाटा व घरगुती गॅस सिलेंडर ताब्यात; नागरिकांच्या जीवितास धोका निर्माण करणाऱ्या बेकायदेशीर रिफिलिंगविरुद्ध पोलिसांची धडक कारवाई
घरगुती वापरासाठी वितरित करण्यात येणाऱ्या एलपीजी गॅस सिलेंडरमधून ऑटोरिक्षा व इतर वाहनांमध्ये व्यावसायिक वापरासाठी बेकायदेशीररीत्या गॅस रिफिलिंग करण्याचा प्रकार खुलताबाद शहरातील जुने बस स्थानक परिसरात उघडकीस आला आहे. सहायक पोलीस अधीक्षक, कन्नड उपविभाग, श्रीमती अपराजिता अग्निहोत्री यांच्या नेतृत्वाखाली करण्यात आलेल्या कारवाईत १३ घरगुती गॅस सिलेंडर, ऑटोरिक्षा, गॅस रिफिलिंगसाठी वापरण्यात येणारी इलेक्ट्रिक मोटार व इलेक्ट्रिक वजनकाटा असा एकूण सुमारे १ लाख ८४ हजार रुपयांचा मुद्देमाल जप्त करण्यात आला आहे.
दिनांक २० ऑगस्ट २०२६ रोजी रात्री सहायक पोलीस अधीक्षक श्रीमती अपराजिता अग्निहोत्री यांना खुलताबाद शहरातील जुने बस स्थानक परिसरात घरगुती वापरासाठी असलेल्या एलपीजी गॅस सिलेंडरमधून वाहनांमध्ये बेकायदेशीररीत्या गॅस रिफिलिंग केले जात असल्याची माहिती मिळाली. माहितीची खातरजमा करून मा. प्रकाश जाधव, पोलीस अधीक्षक, छत्रपती संभाजीनगर ग्रामीण तसेच मा. प्रशांत स्वामी, अपर पोलीस अधीक्षक यांच्या मार्गदर्शनाखाली कन्नड उपविभागीय पोलीस कार्यालयाचे पथक व खुलताबाद पोलीस ठाण्याचे पथक यांना सोबत घेऊन नियोजनबद्ध कारवाई करण्यात आली.
जुने बस स्थानक परिसरात शेख रऊफ हा घरगुती वापरासाठी असलेल्या गॅस सिलेंडरमधून ऑटोरिक्षा व इतर वाहनांमध्ये व्यावसायिक वापरासाठी गॅस रिफिलिंग करत असल्याचे आढळून आले. याठिकाणी घरगुती गॅस सिलेंडर, रिफिलिंगसाठी वापरण्यात येणारी यंत्रणा तसेच वजनकाटा आढळून आल्याने पोलिसांनी तत्काळ कारवाई करत सदर साहित्य व ऑटोरिक्षा ताब्यात घेतली.
अनधिकृत गॅस विक्री किंवा रिफिलिंगपुरता मर्यादित नसून सार्वजनिक सुरक्षिततेशी निगडित गंभीर बाब असल्याने पोलिसांनी त्याची गांभीर्याने दखल घेतली आहे.
या कारवाईदरम्यान गॅस रिफिलिंगसाठी वापरण्यात येणारी इलेक्ट्रिक मोटार व इलेक्ट्रिक वजनकाटा पोलिसांच्या निदर्शनास आला. यावरून घरगुती सिलेंडरमधील गॅस वाहनांमध्ये हस्तांतरित करण्यासाठी स्वतंत्र व्यवस्था वापरली जात असल्याचे स्पष्ट झाले. पोलिसांनी ही संपूर्ण यंत्रणा तसेच संबंधित वाहन व गॅस सिलेंडर जप्त करून पुढील तपास सुरू केला आहे.
या कारवाईत १३ घरगुती गॅस सिलेंडर जप्त करण्यात आले असून, त्यामध्ये घरगुती वापरासाठी उपलब्ध असलेल्या गॅसचा व्यावसायिक कारणासाठी अनधिकृत वापर होत असल्याचा प्रकार समोर आला आहे. जप्त मुद्देमालाची एकूण किंमत सुमारे १ लाख ८४ हजार रुपये आहे.
या प्रकरणी खुलताबाद पोलीस ठाणे येथे भारतीय न्याय संहिता, जीवनावश्यक वस्तू व सेवा अधिनियम तसेच इतर लागू कायद्यांनुसार गुन्हा दाखल करण्यात आला आहे.
ही कारवाई सहायक पोलीस अधीक्षक श्रीमती अपराजिता अग्निहोत्री यांच्या नेतृत्वाखाली कन्नड उपविभागीय पोलीस कार्यालयाचे वाचक पोउपनि अजय पानपाटील, अंमलदार मयुर वाळुंजकर, अमोल गायकवाड, संदिप जोनवाल, योगिता पाटील तसेच खुलताबाद पोलीस ठाण्याचे पो.नि. प्रशांत महाजन, सपोनि संभाजी वडते, पोउपनि राजेश पाटील, पो.ह. ११८९ जाकीर शेख, पोह. १०२ किशोर गवळी, पो.ह. १३६७ सिद्धार्थ सदावर्ते, मपोह १२०४ सोनाली कुंदे, चा.पो.ह. १४०५ अनिल जाधव व पो.कॉ. १७१७ योगेश क्षिरसागर यांनी केली आहे.
