१४ वर्षांनंतर सावित्रीबाई फुले भाजी मंडई सुरू; पात्र ओटे व गाळेधारकांना लवकरच जागा

स्थायी समिती सभापती अनिल मकरिये यांनी नोंदणी प्रक्रियेची केली पाहणी; सुट्टीच्या दिवशीही कार्यालय सुरू ठेवण्याचे निर्देश
छत्रपती संभाजीनगर | प्रतिनिधी
छत्रपती संभाजीनगर महानगरपालिकेच्या वतीने संभाजीपेठ येथील सावित्रीबाई फुले भाजी मंडई तब्बल १४ वर्षांनंतर पुन्हा सुरू करण्यात येत असून, पात्र ओटे व गाळेधारकांना लवकरात लवकर जागा उपलब्ध करून देण्याची प्रक्रिया वेगाने सुरू आहे.
महापालिकेने १ ते ४ जुलै दरम्यान ओटे व गाळेधारकांकडून आवश्यक कागदपत्रे स्वीकारली. यामध्ये गाळे वाटप पत्र, शुल्क भरल्याच्या पावत्या, करारनामा, न्यायालयीन आदेश अथवा प्रलंबित प्रकरणांची प्रत, आधार कार्ड, पॅन कार्ड आदी कागदपत्रांचा समावेश होता.
सध्या मालमत्ता विभागाकडून प्राप्त अर्जांची छाननी सुरू असून पात्र लाभार्थ्यांकडून नियमानुसार शुल्क स्वीकारण्याची प्रक्रिया हाती घेण्यात येत आहे.
शुक्रवारी स्थायी समितीचे सभापती अनिल मकरिये यांनी मालमत्ता विभागाला भेट देऊन नोंदणी प्रक्रियेची प्रत्यक्ष पाहणी केली. त्यांनी ओटे व गाळेधारकांशी संवाद साधून त्यांच्या अडचणी जाणून घेतल्या तसेच संबंधित अधिकाऱ्यांना प्रक्रिया अधिक गतिमान करण्याच्या सूचना दिल्या.
मालमत्ता विभागाच्या माहितीनुसार, आजपर्यंत ३४ ओटेधारक आणि ३२ गाळेधारकांचे अर्ज तपासण्यात आले असून त्यांची अंतिम छाननी सुरू आहे. त्यानंतर नियमानुसार शुल्क स्वीकारण्याची प्रक्रिया सुरू केली जाणार आहे.
लाभार्थ्यांची गैरसोय होऊ नये यासाठी स्थायी समिती सभापती अनिल मकरिये व महापालिका आयुक्त अमोल येडगे यांच्या निर्देशानुसार ११ जुलै (शनिवार) रोजीही मालमत्ता विभागाचे कार्यालय सुरू ठेवण्यात आले आहे. या दिवशीही लाभार्थ्यांना अर्ज सादर करण्याची सुविधा उपलब्ध करून देण्यात आली असून सभापती मकरिये यांनी स्वतः लाभार्थ्यांकडून अर्ज स्वीकारले.
या पाहणीवेळी उपआयुक्त अपर्णा थेटे, सहाय्यक आयुक्त संजय चामले तसेच ओटे व गाळेधारक मोठ्या संख्येने उपस्थित होते.