वेरूळ (महाराष्ट्र न्यूज टाइम्स प्रतिनिधी)
खुलताबाद तालुक्यातील जागतिक वारसा स्थळ परिसरातील ऐतिहासिक ‘सीता न्हाणी’ धबधबा मुसळधार पावसामुळे पुन्हा एकदा ओसंडून वाहू लागला आहे. धबधब्याचे नयनरम्य रूप पाहण्यासाठी पर्यटकांनी मोठी गर्दी केली असून परिसरात उत्साहाचे वातावरण आहे.
गेल्या काही दिवसांपासून झालेल्या दमदार पावसामुळे डोंगररांगांमधून कोसळणाऱ्या पाण्याचा वेग वाढला असून सीता न्हाणी धबधबा पूर्ण क्षमतेने प्रवाहित होत आहे. हिरवाईने नटलेला परिसर, धुक्याची चादर आणि कोसळणारा जलप्रपात यामुळे पर्यटकांना निसर्गसौंदर्याचा अनोखा अनुभव मिळत आहे. छायाचित्रण आणि व्हिडिओग्राफीसाठीही हा परिसर आकर्षणाचे केंद्र ठरत आहे.
सुट्टीच्या दिवशी आणि आठवड्याच्या शेवटी येथे मोठ्या प्रमाणात पर्यटक येत असल्याने स्थानिक प्रशासनाने तसेच पोलिसांनी नागरिकांना सुरक्षिततेचे नियम पाळण्याचे आवाहन केले आहे. धबधब्याच्या अतिजवळ जाणे, घसरड्या दगडांवर उभे राहणे किंवा सेल्फीच्या नादात जीव धोक्यात घालणे टाळावे, असेही प्रशासनाने स्पष्ट केले आहे.
पावसाळ्यात वेरूळ परिसरातील हा ऐतिहासिक धबधबा पर्यटकांसाठी प्रमुख आकर्षण ठरत असून, निसर्गप्रेमींनी सुरक्षिततेची काळजी घेत या मनमोहक निसर्गरम्य स्थळाचा आनंद घ्यावा, असे आवाहन करण्यात आले आहे.
