“पहिले समजावले… नंतर कारवाई! रस्त्यावर कचरा टाकणाऱ्यांवर आयुक्तांचा धडक ॲक्शन” जनजागृती, शिस्त आणि दंडात्मक कारवाईतून स्वच्छ छत्रपती संभाजीनगरच्या दिशेने आणखी एक ठोस पाऊल!

छत्रपती संभाजीनगर, : छत्रपती संभाजीनगर महानगरपालिकेचे मा. आयुक्त श्री. अमोल येडगे यांनी सकाळी नियमित जॉगिंगदरम्यान शहरातील स्वच्छता व घनकचरा व्यवस्थापनाची अचानक पाहणी केली. पाहणीदरम्यान रस्त्यावर कचरा टाकणाऱ्या नागरिकास त्यांनी प्रथम कचरा व्यवस्थापनाचे महत्त्व समजावून सांगितले. घरातील कचरा ओला, सुका, घरगुती घातक आणि सॅनिटरी अशा चार प्रकारांत वर्गीकरण करूनच महानगरपालिकेच्या घंटागाडीत द्यावा, असे आवाहन त्यांनी संबंधित नागरिकास केले.
त्यानंतर सार्वजनिक ठिकाणी कचरा टाकल्याप्रकरणी मा. आयुक्त यांच्या आदेशान्वये संबंधित नागरिकांवर दंडात्मक कारवाई करण्यात आली. झोन क्र. ५ पथकाने ‘क्लीन स्ट्रीट ॲप’ द्वारे ब्रिजवाडी चौक ते उत्तरानगरी, एमआयडीसी चिकलठाणा परिसरात कारवाई करून ₹३,००० दंड वसूल केला.
पाहणीदरम्यान एक कर्मचारी धूम्रपान करताना आढळून आला. सार्वजनिक सेवेत कार्यरत कर्मचाऱ्यांनी कामाच्या वेळेत अथवा इतर कोणत्याही वेळी धूम्रपान करू नये, अशी समज देत संबंधित कर्मचाऱ्यास सुधारणा करण्याच्या उद्देशाने नोटीस बजावण्यात आली.
यावेळी मा. आयुक्तांनी शहरातील स्वच्छता, घनकचरा व्यवस्थापन, घंटागाड्यांमधील वर्गीकृत कचऱ्याचे संकलन तसेच स्वच्छता व्यवस्थेची सविस्तर पाहणी केली. संबंधित अधिकारी, कर्मचारी, आयईसी (IEC) टीम आणि घंटागाडी कर्मचाऱ्यांना नागरिकांना अधिक दर्जेदार स्वच्छता सुविधा उपलब्ध करून देण्यासाठी प्रभावी जनजागृती, शंभर टक्के कचरा संकलन आणि शंभर टक्के कचरा वर्गीकरण सुनिश्चित करण्याबाबत आवश्यक मार्गदर्शक सूचना दिल्या.
छत्रपती संभाजीनगर महानगरपालिका नागरिकांना आवाहन करते की, सार्वजनिक ठिकाणी कचरा टाकू नये. घरातील कचरा चार प्रकारांत वर्गीकृत करूनच घंटागाडीत द्यावा आणि ‘स्वच्छ, सुंदर, हरित छत्रपती संभाजीनगर’ घडविण्याच्या मोहिमेत सक्रिय सहभाग नोंदवावा.