छत्रपती संभाजीनगरात ‘जागतिक व्यसनमुक्ती दिन’ उत्साहात साजरा
छत्रपती संभाजीनगर, प्रतिनिधी : पोलिस आयुक्तालय छत्रपती संभाजीनगरच्या अमलीपदार्थ प्रतिबंधक विभागाच्या वतीने २६ जून रोजी ‘जागतिक व्यसनमुक्ती दिन’ विविध जनजागृती उपक्रमांनी उत्साहात साजरा करण्यात आला. युवकांना अमलीपदार्थांच्या विळख्यातून दूर ठेवणे आणि व्यसनमुक्त समाज घडविण्याच्या उद्देशाने शहरातील विविध ठिकाणी जनजागृती कार्यक्रम, कार्यशाळा आणि बैठकींचे आयोजन करण्यात आले.
पोलीस आयुक्त प्रवीण पवार यांच्या मार्गदर्शनाखाली अमलीपदार्थांविरोधी विशेष मोहिमेअंतर्गत पुणे येथील व्यसनमुक्ती केंद्र ‘उन्मेष’ तसेच ‘अलन करिअर इन्स्टिट्यूट’ यांच्या सहकार्याने जनजागृती कार्यक्रम घेण्यात आला. यावेळी अमलीपदार्थांच्या दुष्परिणामांबाबत मार्गदर्शन करण्यात आले तसेच जनजागृतीपर पोस्टर्स व माहितीपत्रकांचे वाटप करण्यात आले.
सिडको पोलीस ठाण्यामार्फत एमजीएम महाविद्यालयात तर सातारा पोलीस ठाण्यामार्फत एमआयटी महाविद्यालयात विद्यार्थ्यांसाठी विशेष कार्यशाळा आयोजित करण्यात आली. विद्यार्थ्यांनी या उपक्रमांना उत्स्फूर्त प्रतिसाद देत व्यसनमुक्तीचा संदेश समाजात पोहोचविण्याचा संकल्प केला.
पोलीस उपआयुक्त (परिमंडळ-२) रत्नाकर नवले यांच्या उपस्थितीत शहरातील आठ व्यसनमुक्ती केंद्रांच्या पदाधिकाऱ्यांची बैठक घेण्यात आली. यामध्ये अमलीपदार्थांविरोधातील जनजागृती अधिक प्रभावीपणे राबविण्याबाबत चर्चा करण्यात आली. यावेळी भारतभर सायकलद्वारे व्यसनमुक्तीचा संदेश देणारे सायकलपटू सुभाष गंगुर्डे यांनीही उपस्थितांना मार्गदर्शन केले.
यावेळी वरिष्ठ पोलिस अधिकाऱ्यांनी अमलीपदार्थांची विक्री व तस्करी करणाऱ्यांवर कठोर कारवाई सुरूच राहणार असल्याचे स्पष्ट केले. नागरिकांनी अशा प्रकारच्या बेकायदेशीर कृत्यांची माहिती तात्काळ पोलिसांना द्यावी, तसेच माहिती देणाऱ्यांची ओळख गोपनीय ठेवली जाईल, असे आवाहन करण्यात आले.
सदर उपक्रम पोलीस आयुक्त प्रवीण पवार, पोलीस उपआयुक्त (गुन्हे) प्रशांत महाले, पोलीस उपआयुक्त (परिमंडळ-२) रत्नाकर नवले यांच्या मार्गदर्शनाखाली अमलीपदार्थ प्रतिबंधक विभाग, सिडको व सातारा पोलीस ठाण्याच्या अधिकाऱ्यांच्या सहकार्याने यशस्वीपणे पार पडला.
