छत्रपती संभाजीनगर 24 जून (प्रतिनिधी)ग्रामीण पोलिसांचे गृहस्वप्न साकारणार; ९६ अधिकारी-अंमलदारांना ₹३०.९० कोटींहून अधिक घरबांधणी अग्रिम (DG Loan) वितरित…
पोलीस अधिकारी व अंमलदारांचे स्वतःच्या घराचे स्वप्न साकार व्हावे, त्यांच्या कुटुंबाला सुरक्षित व स्थिर निवास उपलब्ध व्हावा आणि त्यांच्या आर्थिक स्थैर्यास बळकटी मिळावी या उद्देशाने महाराष्ट्र शासनाने घरबांधणी अग्रिम (DG Loan) योजनेअंतर्गत महत्त्वपूर्ण निर्णय घेतला आहे. संभाजीनगर ग्रामीण पोलीस दलातील ९६ अधिकारी व अंमलदारांना एकूण ₹३०,९०,५१,०००/- (अक्षरी रुपये तीस कोटी नव्वद लाख एकावन्न हजार फक्त) इतकी रक्कम मंजूर करण्यात आली असून ती आज संबंधित लाभार्थ्यांच्या बँक खात्यात वर्ग करण्यात आली आहे.
मा. पोलीस महासंचालक, महाराष्ट्र राज्य, मुंबई यांच्या आदेशानुसार मंजूर करण्यात आलेल्या या निधीमुळे लाभार्थी अधिकारी व अंमलदारांना नवीन घराचे बांधकाम करणे, सुरू असलेले बांधकाम पूर्ण करणे तसेच गृहसंबंधित विविध आर्थिक जबाबदाऱ्या पार पाडणे अधिक सुलभ होणार आहे.
शासनाच्या गृह विभागाच्या विविध शासन निर्णयांनुसार व वित्तीय नियमांतील तरतुदींनुसार सदर मंजुरी प्रदान करण्यात आली आहे. निधी मंजूर झाल्यानंतर त्याचा लाभ अधिकारी व अंमलदारांना तात्काळ मिळावा यासाठी *मा. प्रकाश जाधव, पोलीस अधीक्षक, छत्रपती संभाजीनगर ग्रामीण यांच्या मार्गदर्शनाखाली* आवश्यक प्रशासकीय कार्यवाही जलदगतीने पूर्ण करण्यात आली. *परिणामी मंजूर झालेली संपूर्ण रक्कम आज संबंधित लाभार्थ्यांच्या बँक खात्यांमध्ये थेट जमा करण्यात आली आहे.*
पोलीस अधिकारी व कर्मचारी हे दिवस-रात्र जनतेच्या सेवेसाठी, कायदा व सुव्यवस्था अबाधित राखण्यासाठी, गुन्हे प्रतिबंधासाठी तसेच विविध आपत्कालीन परिस्थितींमध्ये कर्तव्य बजावत असतात. अनेकदा स्वतःच्या वैयक्तिक गरजांपेक्षा कर्तव्याला प्राधान्य देणाऱ्या या कर्मचाऱ्यांसाठी स्वतःचे घर उभारणे हे आयुष्यभराचे स्वप्न असते. शासनाच्या या निर्णयामुळे त्या स्वप्नपूर्तीकडे एक महत्त्वपूर्ण पाऊल टाकले गेले आहे.
सदर DG Loan मुळे पोलीस अधिकारी व अंमलदारांना आर्थिक सुरक्षिततेची भावना निर्माण होणार असून त्यांच्या कुटुंबीयांनाही मोठा दिलासा मिळणार आहे. स्वतःचे घर हे प्रत्येक कुटुंबासाठी सुरक्षिततेचे आणि स्थैर्याचे प्रतीक मानले जाते. त्यामुळे या योजनेचा लाभ मिळाल्याने संबंधित अधिकारी व अंमलदारांमध्ये आनंद व समाधानाचे वातावरण निर्माण झाले आहे.
घरबांधणी अग्रिमाच्या माध्यमातून पोलीस कर्मचाऱ्यांच्या कल्याणाला प्राधान्य देणाऱ्या शासनाच्या सकारात्मक धोरणाची पुन्हा एकदा प्रचिती आली असून, या निर्णयामुळे छत्रपती संभाजीनगर ग्रामीण पोलीस दलातील अधिकारी व अंमलदारांचे गृहस्वप्न प्रत्यक्षात साकार होण्यास मोठी मदत मिळणार आहे. या निधीमुळे केवळ घरे उभी राहणार नाहीत, तर पोलीस कुटुंबांच्या सुरक्षित, सन्माननीय आणि स्थिर भविष्यासही भक्कम आधार मिळणार आहे.
