छत्रपती संभाजीनगर, दि. २४ : भारत निवडणूक आयोगाच्या निर्देशानुसार राज्यभर राबविण्यात येत असलेल्या विशेष सखोल मतदार पुनरीक्षण (Special Intensive Revision – SIR) मोहिमेच्या प्रभावी अंमलबजावणीसाठी प्रशासन, लोकप्रतिनिधी, सामाजिक संस्था आणि नागरिकांनी समन्वयाने काम करणे आवश्यक असल्याचे प्रतिपादन अप्पर मुख्य सचिव तथा मुख्य निवडणूक अधिकारी S. Chokkalingam यांनी केले.
जिल्हाधिकारी कार्यालयात आयोजित आढावा व मार्गदर्शन बैठकीत ते बोलत होते. यावेळी विभागातील जिल्हाधिकारी, उपजिल्हा निवडणूक अधिकारी, मतदार नोंदणी अधिकारी तसेच निवडणूक विभागाचे वरिष्ठ अधिकारी उपस्थित होते.
श्री. चोक्कलिंगम यांनी सांगितले की, मतदार यादी अधिक अचूक, पारदर्शक आणि अद्ययावत करण्याच्या उद्देशाने निवडणूक आयोगाने ही विशेष मोहीम हाती घेतली आहे. नागरिकांच्या शंकांचे निरसन करण्यासाठी मदत कक्ष उभारण्यात यावेत तसेच लोकप्रतिनिधी, सामाजिक संस्था, स्वयंसेवी संघटना, मतदान केंद्रस्तरीय प्रतिनिधी (बीएलए) आणि स्वयंसेवक यांना सहभागी करून घेण्याच्या सूचना त्यांनी दिल्या.
कोणत्याही पात्र नागरिकाचे नाव मतदार यादीतून वगळले जाणार नाही, तसेच अपात्र नोंदींची काटेकोर छाननी करूनच निर्णय घेण्यात येतील, असे त्यांनी स्पष्ट केले. भारतीय संविधान, लोकप्रतिनिधी कायदा आणि सर्वोच्च न्यायालयाच्या निर्णयांच्या आधारे कायदेशीर तरतुदीनुसार कार्यवाही करण्याचे निर्देशही त्यांनी दिले.
३० जून ते २९ जुलैदरम्यान घराघरात पडताळणी
विशेष सखोल मतदार पुनरीक्षण मोहिमेअंतर्गत ३० जून ते २९ जुलै २०२६ या कालावधीत मतदान केंद्रस्तरीय अधिकारी (बीएलओ) मतदारांच्या घरी प्रत्यक्ष भेट देऊन गणना अर्जांचे वितरण व संकलन करतील. यावेळी मतदारांचे नाव, पत्ता, छायाचित्र आणि इतर तपशीलांची पडताळणी करण्यात येणार आहे.
तसेच अनुपस्थित, स्थलांतरित, मृत अथवा डुप्लिकेट नोंदींची तपासणी करून मतदार यादी अधिक अचूक करण्यावर भर दिला जाणार आहे. संपूर्ण माहिती डिजिटल पद्धतीने वेळेत अद्ययावत करण्याच्या सूचनाही यावेळी देण्यात आल्या.
लोकशाही बळकट करण्यासाठी महत्त्वपूर्ण मोहीम
बैठकीत विभागातील सर्व जिल्हाधिकाऱ्यांनी आपल्या जिल्ह्यातील तयारीचा आढावा सादर केला. प्रशिक्षण, जनजागृती, मतदार यादी मॅपिंग, बीएलओ नियुक्ती, अर्ज वितरण व पडताळणी प्रक्रिया यासाठी आवश्यक तयारी पूर्ण झाल्याची माहिती देण्यात आली.
यावेळी Rahul Kardile, Vivek Johnson, Sanjaysingh Chavan, Kirti Kiran Pujar, Rahul Gupta, Ashima Mittal यांच्यासह संबंधित अधिकारी उपस्थित होते.
— महाराष्ट्र न्यूज टाइम्स
