छत्रपती संभाजीनगर, दि. 12 : विभागातील तेलबिया व कडधान्य पिकांचे काढणीनंतर होणारे नुकसान कमी करण्यासाठी तसेच स्थानिक पातळीवर मूल्यवर्धनाला चालना देण्यासाठी कृषी विभागामार्फत केंद्र व राज्य शासनाच्या राष्ट्रीय खाद्यतेल अभियान (NMEO-OS) आणि कडधान्य आत्मनिर्भरता अभियान सन 2026-27 अंतर्गत विविध प्रक्रिया युनिट्स व गोदामांसाठी मोठ्या प्रमाणावर अनुदान देण्यात येत आहे. या योजनेअंतर्गत पात्र लाभार्थ्यांकडून सबंधित तालुका कृषी अधिकारी कार्यालयात अर्ज मागविण्यात आले आहेत.
योजनेअंतर्गत 250 मेट्रिक टन क्षमतेच्या गोदाम बांधकामासाठी अंदाजित खर्चाच्या 50 टक्के किंवा कमाल 14.40 लाख रुपयांपर्यंत अनुदान देण्यात येणार आहे. तसेच 10 टन प्रतिदिन क्षमतेच्या तेल काढणी युनिटसाठी प्रकल्प खर्चाच्या 33 टक्के किंवा कमाल 19.90 लाख रुपये अनुदान मिळणार आहे.
मिनी ऑईल मिल (फिल्टर प्रेससह) या घटकासाठी किमतीच्या 40 ते 50 टक्के किंवा कमाल 4 लाख रुपयांपर्यंत अनुदान देण्यात येईल.मिनी ऑईल मिल (फिल्टर प्रेस शिवाय ) या घटकासाठी किमतीच्या 40 ते 50 टक्के किंवा कमाल 3 लाख रुपयांपर्यंत अनुदान देण्यात येईल. याशिवाय कडधान्य प्रक्रिया व पॅकेजिंग युनिट (किमान क्षमता 300 किलो प्रतितास) स्थापनेसाठी प्रकल्प खर्चाच्या 33 टक्के किंवा कमाल 25 लाख रुपये अनुदान देण्यात येणार आहे.
गोदाम बांधकामासाठी एफपीओ, एफपीसी, सहकारी संस्था, सरकारी व खासगी उद्योग तसेच समूह आधारित व्यवसाय संस्था (CBBOs) पात्र असून मूल्य साखळी भागीदार (VCP) गटांना विशेष प्राधान्य देण्यात येणार आहे. तेल काढणी युनिटसाठी वैयक्तिक शेतकरी, एफपीओ, सहकारी संस्था, खासगी उद्योग आणि नोंदणीकृत नवीन तेल प्रक्रिया कंपन्या अर्ज करू शकतात.
कडधान्य प्रक्रिया व पॅकेजिंग युनिटसाठी एफपीओ, क्लस्टर स्तरावरील महासंघ (CLFs), PACS आणि वैयक्तिक उद्योजक पात्र आहेत. लाभार्थ्यांनी स्वतःचे किमान 15 टक्के भांडवल उपलब्ध करणे आवश्यक असून बँक कर्ज घेणे अनिवार्य आहे.
इच्छुक लाभार्थ्यांनी विहित नमुन्यातील अर्ज आपल्या संबंधित तालुका कृषी अधिकारी कार्यालयात तातडीने सादर करावेत, असे आवाहन विभागीय कृषी सहसंचालक सुनील वानखेडे यांनी केले आहे. अधिक माहितीसाठी संबंधित सहाय्यक कृषी अधिकारी किंवा तालुका कृषी अधिकारी कार्यालयाशी संपर्क साधावा, असेही त्यांनी सांगितले.
