विद्यार्थ्यांच्या गुणवत्तेबरोबरच सुरक्षेलाही प्राधान्य देणार – आयुक्त अमोल येडगे
छत्रपती संभाजीनगर, दि. 12 जून : छत्रपती संभाजीनगर महानगरपालिका शिक्षण विभागांतर्गत कार्यरत असलेल्या 50 शाळांमध्ये नवीन शैक्षणिक वर्षाच्या प्रारंभासाठी आणि शाळा प्रवेशोत्सव यशस्वीपणे राबविण्यासाठी मनपा आयुक्त अमोल येडगे यांच्या अध्यक्षतेखाली सर्व मुख्याध्यापकांची शाळापूर्व तयारी आढावा बैठक संपन्न झाली.
महानगरपालिकेच्या शाळांमध्ये अधिकाधिक विद्यार्थ्यांनी प्रवेश घ्यावा तसेच शाळेचा पहिला दिवस उत्साहपूर्ण वातावरणात साजरा व्हावा, यासाठी 15 जून 2026 रोजी प्रवेशोत्सवाचे आयोजन करण्यात आले आहे. यानिमित्त प्रत्येक शाळेत महानगरपालिकेचे वर्ग-1 व वर्ग-2 दर्जाचे अधिकारी ‘पालक अधिकारी’ म्हणून उपस्थित राहणार असून त्यांच्या हस्ते नवागत विद्यार्थ्यांचे स्वागत, पाठ्यपुस्तकांचे वितरण तसेच गणवेश वाटप करण्यात येणार आहे. यासाठी 50 अधिकाऱ्यांची पालक अधिकारी म्हणून नियुक्ती करण्यात आली आहे.
बैठकीत आयुक्तांनी मुख्याध्यापकांना प्रवेशोत्सवाचे नियोजन, विद्यार्थ्यांची पटसंख्या वाढ, शैक्षणिक गुणवत्ता, नियमित उपस्थिती तसेच विद्यार्थ्यांच्या सुरक्षेबाबत आवश्यक मार्गदर्शन केले. विद्यार्थ्यांच्या सर्वांगीण विकासासाठी गुणवत्तापूर्ण शिक्षण जितके महत्त्वाचे आहे, तितकीच त्यांची सुरक्षितता देखील महत्त्वाची असल्याचे त्यांनी यावेळी अधोरेखित केले.
यावेळी आयुक्त अमोल येडगे यांनी सर्व विद्यार्थी, पालक आणि शिक्षकांना नवीन शैक्षणिक वर्षाच्या तसेच प्रवेशोत्सवाच्या शुभेच्छा दिल्या.
बैठकीस अतिरिक्त आयुक्त रणजीत पाटील, उपआयुक्त तथा शिक्षण विभाग प्रमुख अंकुश पांढरे, शिक्षणाधिकारी भारत तिनगोटे, प्रशासन अधिकारी संजीव सोनार, शिक्षण विस्तार अधिकारी रईसा खान बेगम, कार्यक्रम अधिकारी ज्ञानदेव सांगळे, विजय कोल्हे तसेच सर्व केंद्रीय मुख्याध्यापक व मुख्याध्यापक उपस्थित होते.
बैठकीचे सूत्रसंचालन व आभारप्रदर्शन कार्यक्रम अधिकारी ज्ञानदेव सांगळे यांनी केले.
