खुलताबाद, दि. ११ जून – वेरूळ (ता. खुलताबाद) येथील जिल्हा परिषद शिक्षक सुरेश रूपचंद बोरसे यांच्या संशयास्पद मृत्यू प्रकरणाने संपूर्ण जिल्ह्यात खळबळ उडाली असून या प्रकरणात वेगवेगळे दावे समोर येत आहेत. दरम्यान, खुलताबाद पोलीस ठाण्यात दाखल करण्यात आलेल्या FIR मुळे या प्रकरणाला आणखी नवे वळण मिळाले आहे.
मयत शिक्षकांच्या पत्नी अनिता सुरेश बोरसे यांनी दिलेल्या फिर्यादीनुसार, १० जूनच्या मध्यरात्री घराबाहेर गोंधळ सुरू असल्याने सुरेश बोरसे हे बाहेर गेले होते. त्यावेळी काही व्यक्तींनी त्यांना एका काळ्या रंगाच्या स्कॉर्पिओ वाहनात बसवून नेल्याचा आरोप करण्यात आला आहे. संबंधित वाहनावर “पोलीस” अशी पाटी असल्याचा उल्लेख FIR मध्ये करण्यात आला आहे. पत्नी व मुलींनी विरोध केल्यानंतरही संबंधितांनी “आम्ही पोलीस आहोत” असे सांगितल्याचा दावा फिर्यादीने केला आहे.
यानंतर सुरेश बोरसे यांना रुग्णालयात नेण्यात आले. मात्र उपचारादरम्यान त्यांचा मृत्यू झाला. फिर्यादीने आपल्या तक्रारीत पतीला मारहाण झाल्याने त्यांचा मृत्यू झाल्याचा गंभीर आरोप केला आहे. या प्रकरणी खुलताबाद पोलीस ठाण्यात गुन्हा क्रमांक 0249/2026 दाखल करण्यात आला असून भारतीय न्याय संहिता (BNS) कलम 106(1) व 131 अंतर्गत सात अनोळखी व्यक्तींविरुद्ध गुन्हा नोंदविण्यात आला आहे.
दरम्यान, या घटनेबाबत विविध वृत्तमाध्यमांतून वेगवेगळी माहिती समोर येत आहे. काही वृत्तांमध्ये पोलिसांच्या मारहाणीमुळे शिक्षकाचा मृत्यू झाल्याचा आरोप करण्यात आला आहे. तर काही वृत्तांनुसार वेरूळ परिसरात सुरू असलेल्या वाळू तस्करांच्या वादात मध्यस्थी करण्याचा प्रयत्न करत असताना त्यांच्यावर हल्ला झाला असावा, अशी शक्यता व्यक्त करण्यात आली आहे.
दुसरीकडे पोलिसांनी मारहाणीचे आरोप फेटाळल्याचे वृत्त असून प्राथमिक वैद्यकीय अहवालानुसार मृत्यूचे कारण हृदयविकाराचा झटका असल्याचा दावा करण्यात येत आहे. त्यामुळे या प्रकरणात नेमके सत्य काय, याबाबत अद्याप संभ्रम कायम आहे.
घटनेनंतर संतप्त ग्रामस्थ आणि नातेवाईकांनी निषेध व्यक्त करत रास्ता रोको आंदोलन केले. तसेच या संपूर्ण प्रकरणाची निष्पक्ष आणि सखोल चौकशी करून दोषींवर कठोर कारवाई करण्याची मागणी करण्यात येत आहे.
सध्या FIR मधील आरोप, पोलिसांची भूमिका आणि विविध माध्यमांमधून समोर येणारी माहिती यामध्ये तफावत दिसून येत असल्याने या प्रकरणाचा अंतिम उलगडा तपास आणि अधिकृत अहवालानंतरच होणार आहे. जिल्हाभराचे लक्ष आता तपास यंत्रणेच्या पुढील कारवाईकडे लागले आहे.
माजी विरोधी पक्षनेते तथा आमदार अंबादास दानवे हे तिथे आले व त्यांनी घटनेची माहिती घेऊन संतप्त ग्रामस्थ व नातेवाईकांसोबत निषेध व्यक्त केला व FRI नोंदण्यासाठी गृह धरला होता.
– महाराष्ट्र न्यूज टाइम्स
