पैठण, दि. 10जून (प्रतिनिधी): पैठण येथील १७ वर्षीय अल्पवयीन युवक अमोल अहिरे यांच्या खून प्रकरणातील प्रमुख आरोपी आणि शिंदे गटाचे नगरसेवक ईश्वर दगडे यांनी अखेर पैठण पोलिसांसमोर आत्मसमर्पण (शरणागती) केले आहे. पोलिसांनी त्यांना ताब्यात घेत पुढील कायदेशीर अटकेची प्रक्रिया सुरू केली आहे.
सदर घटना १ जून २०२६ रोजी पैठण शहरातील एकता नगर परिसरात घडली होती. प्राथमिक माहितीनुसार, जुन्या वादाच्या कारणावरून ईश्वर दगडे व त्यांच्या साथीदारांनी अमोल अहिरे यांच्यावर त्यांच्या आई-वडिलांसमोरच धारदार शस्त्रांनी हल्ला केला. या भीषण हल्ल्यात अमोल अहिरे यांचा मृत्यू झाला होता.
या घटनेनंतर पैठण शहरासह संपूर्ण परिसरात संतापाची लाट उसळली होती. मृत युवकाच्या कुटुंबीयांसह नागरिकांनी आरोपींना तातडीने अटक करून कठोर कारवाई करण्याची मागणी केली होती. घटनेनंतर ईश्वर दगडे फरार होते. त्यांचा शोध घेण्यासाठी पोलिसांनी विविध ठिकाणी पथके रवाना केली होती.
दरम्यान, ईश्वर दगडे यांनी स्वतःहून पैठण पोलिसांसमोर हजर होत आत्मसमर्पण केले. त्यानंतर पोलिसांनी त्यांना ताब्यात घेतले असून प्रकरणाचा अधिक तपास सुरू आहे. या खून प्रकरणातील इतर आरोपी, घटनेमागील नेमके कारण आणि संपूर्ण कटाचा तपास पोलीस करीत आहेत.
