छत्रपती संभाजीनगर, दि. ९ : महाराष्ट्र संशोधन, उन्नती व प्रशिक्षण प्रबोधिनी (अमृत) यांच्या वतीने ‘अमृत मानसमित्र समुपदेशक प्रशिक्षण कार्यक्रम’ राबविण्यात येत असून पहिल्या बॅचसाठी १५ ते २२ जून २०२६ या कालावधीत ऑनलाइन अर्ज मागविण्यात आले आहेत.
महाराष्ट्र शासनाची स्वायत्त संस्था असलेल्या अमृतमार्फत हा अभ्यासक्रम आयोजित करण्यात येत असून पुणे येथील Maharashtra Institute of Mental Health (MIMH) ही संस्था तांत्रिक भागीदार म्हणून कार्यरत राहणार आहे. मानसशास्त्र, समुपदेशन आणि सामाजिक कार्य क्षेत्रातील युवक-युवतींसाठी स्वयंरोजगार, व्यावसायिक विकास आणि समाजोपयोगी कार्याची ही महत्त्वपूर्ण संधी मानली जात आहे.
प्रशिक्षणामध्ये विद्यार्थी समुपदेशनाची मूलतत्त्वे, बाल व किशोर मानसिक आरोग्य, संवाद कौशल्ये, तणाव व्यवस्थापन, जीवनकौशल्य शिक्षण, आत्महत्या प्रतिबंध, सायबर सुरक्षा, पालक-शिक्षक समन्वय, मानसिक आरोग्य जनजागृती तसेच शाळा आधारित समुपदेशन व रेफरल प्रणाली यांसारख्या विषयांचा समावेश करण्यात आला आहे.
प्रशिक्षण पूर्ण केलेल्या उमेदवारांना शाळा व महाविद्यालयीन समुपदेशक, मानसमित्र समुपदेशक, जीवनकौशल्य प्रशिक्षक, मानसिक आरोग्य जनजागृती प्रशिक्षक, पालक-शिक्षक कार्यशाळा समन्वयक, विद्यार्थी कल्याण अधिकारी तसेच स्वयंरोजगाराच्या माध्यमातून समुपदेशन सेवा क्षेत्रात काम करण्याच्या संधी उपलब्ध होऊ शकतात.
सहा महिन्यांच्या या प्रशिक्षणात १५ दिवसांचे प्रत्यक्ष वर्ग प्रशिक्षण, एक महिन्याची निरीक्षणाधारित क्षेत्रीय नियुक्ती, ऑनलाइन तज्ज्ञ सत्रे, केस स्टडी, रोल प्ले, मार्गदर्शन व सुपरव्हिजनचा समावेश असेल. प्रशिक्षण ऑफलाइन आणि ऑनलाइन अशा दोन्ही स्वरूपात होणार आहे.
पात्रता
एम.ए./एम.एस्सी. मानसशास्त्र
एम.ए./एम.एस्सी. समुपदेशन मानसशास्त्र
मास्टर ऑफ सोशल वर्क (MSW)
डोमिसाईल, उत्पन्नाचा दाखला व जात प्रमाणपत्र
पुण्यात ऑफलाइन प्रशिक्षण
१५ दिवसांचे ऑफलाइन प्रशिक्षण पुणे येथील महाराष्ट्र मानसिक आरोग्य संस्थेमध्ये आयोजित करण्यात येणार आहे. या कालावधीतील निवास व भोजनाची व्यवस्था प्रशिक्षणार्थ्यांना स्वतः करावी लागणार आहे.
पूर्णपणे मोफत प्रशिक्षण
अमृतच्या लक्षित गटातील पात्र उमेदवारांचा सहा महिन्यांच्या प्रशिक्षणाचा संपूर्ण शैक्षणिक खर्च अमृत संस्थेमार्फत केला जाणार असल्याने हे प्रशिक्षण पूर्णपणे मोफत उपलब्ध होणार आहे.
अर्ज प्रक्रिया
इच्छुक उमेदवारांनी अमृतच्या अधिकृत संकेतस्थळावर जाऊन ऑनलाइन अर्ज करावा.
अर्जासोबत आवश्यक कागदपत्रे अपलोड करणे बंधनकारक असून “प्रथम येईल त्यास प्राधान्य” या तत्त्वावर प्रवेश दिला जाणार आहे. छाननीनंतर पात्र उमेदवारांना ई-मेल किंवा संदेशाद्वारे माहिती देण्यात येईल.
अधिक माहितीसाठी
अमृत विभागीय व जिल्हा कार्यालय, पुंडलिक नगर रोड, सेक्टर-४ सिडको, हनुमान नगर पाण्याच्या टाकीजवळ, छत्रपती संभाजीनगर.
संपर्क: 7391065475 / 9403200606
