बीड/जालना, दि. 6 जून: अपघात प्रकरणातील विमा दाव्यासाठी आवश्यक कागदपत्रे देण्याच्या मोबदल्यात 10 हजार रुपयांची लाच मागून स्वीकारल्याप्रकरणी नेकनूर पोलीस ठाण्यातील पोलीस हवालदार आणि एका होमगार्डला लाचलुचपत प्रतिबंधक विभागाच्या (ACB) जालना पथकाने रंगेहाथ पकडले.
लाचलुचपत प्रतिबंधक विभागाने दिलेल्या माहितीनुसार, तक्रारदाराच्या वडिलांचा 6 मार्च 2026 रोजी झालेल्या अपघातात उपचारादरम्यान मृत्यू झाला होता. या प्रकरणातील अपघाताशी संबंधित कागदपत्रे विमा दाव्यासाठी आवश्यक होती. ती उपलब्ध करून देण्यासाठी नेकनूर पोलीस ठाण्यात कार्यरत असलेले पोलीस हवालदार दत्तात्रय साहेबराव बळवंत (वय 41) यांनी सुरुवातीला 15 हजार रुपयांची मागणी केली होती. तडजोडीनंतर ही रक्कम 10 हजार रुपयांवर निश्चित करण्यात आली.
तक्रारदाराने याबाबत जालना लाचलुचपत प्रतिबंधक विभागाकडे तक्रार दिली. 3 जून रोजी करण्यात आलेल्या पडताळणीत लाचेची मागणी झाल्याचे निष्पन्न झाले. त्यानंतर 6 जून रोजी सापळा रचण्यात आला.
सापळ्यादरम्यान पोलीस हवालदार दत्तात्रय बळवंत यांनी लाचेची रक्कम होमगार्ड रशिद दगडुखा पठाण (वय 52) यांच्याकडे देण्यास सांगितले. त्यानुसार तक्रारदाराकडून 10 हजार रुपयांची लाच स्वीकारताना रशिद पठाण याला पंचांसमक्ष ताब्यात घेण्यात आले. कारवाईदरम्यान लाचेची रक्कम जप्त करण्यात आली.
दोन्ही संशयितांची अंगझडती घेण्यात आली असून मोबाईल फोन आणि रोख रक्कम जप्त करण्यात आली आहे. तसेच घरझडतीची प्रक्रिया सुरू असून नेकनूर पोलीस ठाण्यात गुन्हा दाखल करण्याची कार्यवाही सुरू होती.
ही कारवाई पोलीस उपअधीक्षक बाळू संपती जाधवर यांच्या मार्गदर्शनाखाली करण्यात आली. तपास पोलीस निरीक्षक शरदचंद्र रोडगे करीत आहेत. या कारवाईसाठी पोलीस अधीक्षक माधुरी केदार कांगणे आणि अपर पोलीस अधीक्षक शशिकांत सिंगारे यांचे मार्गदर्शन लाभले.
लाचलुचपत प्रतिबंधक विभागाने नागरिकांना आवाहन केले आहे की, कोणताही शासकीय अधिकारी किंवा त्याच्या वतीने खाजगी व्यक्ती शासकीय कामासाठी कायदेशीर शुल्काव्यतिरिक्त पैशांची मागणी करत असल्यास तात्काळ तक्रार करावी.
संपर्क
📞 टोल फ्री : 1064
📱 व्हॉट्सअॅप : 9764021064
📞 पोलीस अधीक्षक, ACB छत्रपती संभाजीनगर : 9011092777
📞 पोलीस उपअधीक्षक, ACB जालना : 9881463365
अपघात प्रकरणातील कागदपत्रांसाठी 10 हजारांची लाच घेताना पोलीस हवालदारासह होमगार्ड जाळ्यात
