छत्रपती संभाजीनगर, दि. ५ (जिमाका) – राष्ट्रीय खत विक्री आराखड्यानुसार मोबाईल ॲपद्वारे खत नोंदणी व वितरण करण्यासाठी ‘फ्रेमवर्क फॉर फर्टिलायझर सेल’ हा पथदर्शी प्रकल्प छत्रपती संभाजीनगर जिल्ह्यात कार्यान्वित करण्यात आला आहे. आजपासून या प्रकल्पाची अंमलबजावणी सुरू झाली असून फुलंब्री येथे शेतकऱ्यांमध्ये जनजागृती करण्यात आली.
या कार्यक्रमाला विनय गौडा जी.सी. प्रमुख उपस्थित होते. यावेळी शेतकऱ्यांना मोबाईल ॲपच्या माध्यमातून खत खरेदी, नोंदणी आणि वितरण प्रक्रियेबाबत सविस्तर माहिती देण्यात आली.
कार्यक्रमास वासुदेव साळुंखे, नीलम बाफना, दीपक गवळी, योगिता खटावकर, कृषी अधिकारी पंकज वाकळे, कृषी अधिकारी (गुणनियंत्रण) शांतीलाल हिवराळे, राम बेंबरे यांच्यासह विविध विभागांचे अधिकारी, कर्मचारी, खत विक्रेते आणि शेतकरी मोठ्या संख्येने उपस्थित होते.
यावेळी जिल्हाधिकारी विनय गौडा यांच्या हस्ते खत वितरणासाठी विकसित करण्यात आलेल्या मोबाईल ॲपच्या जनजागृतीपर पोस्टरचे विमोचन करण्यात आले. या नव्या प्रणालीमुळे खत वितरण प्रक्रियेत पारदर्शकता वाढणार असून शेतकऱ्यांना आवश्यक खत वेळेत उपलब्ध होण्यास मदत होईल, असा विश्वास कृषी विभागाने व्यक्त केला.
या पथदर्शी प्रकल्पामुळे खत विक्री व वितरणाची प्रक्रिया अधिक सुलभ, डिजिटल आणि परिणामकारक होणार असून शेतकऱ्यांना आधुनिक तंत्रज्ञानाचा लाभ मिळणार आहे.
— महाराष्ट्र न्यूज टाईम
