छत्रपती संभाजीनगर | दि. ४ जून
मान्सूनपूर्व काळात डेंग्यू, मलेरिया व इतर डासजन्य आजारांवर नियंत्रण मिळवण्यासाठी छत्रपती संभाजीनगर महानगरपालिकेच्या आरोग्य मलेरिया विभागाने राबविलेल्या धडक अबेट मोहिमेला उल्लेखनीय यश मिळाले आहे. १ जून २०२६ पासून शहरातील सर्व १० झोनमधील अतिजोखीमग्रस्त भागांमध्ये विशेष कारवाई करण्यात आली.
महापौर समीर राजुरकर, उपमहापौर राजेंद्र जंजाळ, विरोधी पक्षनेते समीर साजिद, स्थायी समिती सभापती अनिल मकरिये, आयुक्त अमोल येडगे आणि वैद्यकीय सहाय्य व आरोग्य समिती सभापती डॉ. सुनीता सोळुंके यांच्या मार्गदर्शनाखाली ही मोहीम राबविण्यात आली. वैद्यकीय आरोग्य अधिकारी डॉ. उज्वला भामरे आणि जीवशास्त्रवेत्ता व साथरोग अधिकारी डॉ. सय्यद सुमैय्या नाज यांच्या अधिपत्याखाली आरोग्य विभागाच्या कर्मचाऱ्यांनी घरभेटी देऊन व्यापक जनजागृती केली.
मोहिमेदरम्यान कंटेनर सर्वेक्षण, अबेट औषध फवारणी, माहितीपत्रकांचे वितरण, जनजागृतीपर स्टिकर्स लावणे आणि नागरिकांना ‘कोरडा दिवस’ पाळण्याबाबत मार्गदर्शन करण्यात आले. घरातील पाण्याच्या टाक्या, कुलर, फुलदाण्या व इतर पाणी साठवणाऱ्या वस्तू नियमित स्वच्छ ठेवण्याचे आवाहन करण्यात आले.
मोहिमेतील प्रमुख आकडेवारी
सर्वेक्षण करण्यात आलेली घरे: 58,737
अबेट औषध टाकण्यात आलेले कंटेनर्स: 44,031
माहितीपत्रकांचे वितरण: 6,994 घरे
जनजागृती स्टिकर्स लावण्यात आलेली घरे: 4,293
नागरिकांच्या सहकार्यामुळे आणि आरोग्य विभागाच्या समन्वित प्रयत्नांमुळे ही मोहीम प्रभावीपणे यशस्वी ठरली असून डासजन्य आजारांवर नियंत्रणासाठी भविष्यातही नागरिकांनी स्वच्छता राखून प्रशासनाला सहकार्य करावे, असे आवाहन महानगरपालिका आरोग्य विभागाने केले आहे.
धडक अबेट मोहिमेला मोठे यश; 58 हजारांहून अधिक घरांचे सर्वेक्षण
