छत्रपती संभाजीनगर, दि. 4 जून : केंद्र शासन व महाराष्ट्र शासन यांच्या संयुक्त विद्यमाने अनुदानित खत वितरण अधिक पारदर्शक, सुलभ आणि प्रभावी करण्यासाठी “नॅशनल फ्रेमवर्क फॉर फर्टिलायझर सेल” हा पथदर्शी प्रकल्प 5 जून 2026 पासून छत्रपती संभाजीनगर जिल्ह्यात सुरू करण्यात येणार आहे.
या प्रकल्पांतर्गत शेतकऱ्यांना अनुदानित खत खरेदीसाठी आता “Framework For Fertilizer Sale” या मोबाईल ॲपचा वापर करावा लागणार आहे. सदर ॲप प्ले स्टोअरवर उपलब्ध असून शेतकऱ्यांनी खत खरेदीपूर्वी ॲपद्वारे बुकिंग करणे आवश्यक राहणार आहे.
कृषी विभागाच्या माहितीनुसार, या नवीन प्रणालीमध्ये ॲग्रीस्टॅक (Farmer ID) आणि खत वितरणासाठी वापरल्या जाणाऱ्या IFMS प्रणालीचे एकत्रीकरण करण्यात आले आहे. त्यामुळे प्रत्येक शेतकऱ्याच्या नावावर खरेदी होणाऱ्या अनुदानित खताची अचूक नोंद राहणार आहे.
QR कोडद्वारे खत वितरण
शेतकऱ्याने ॲपवरून आपल्या पसंतीच्या कृषी सेवा केंद्रावर खताची बुकिंग केल्यानंतर त्याला QR कोड प्राप्त होईल. बुकिंग केलेले खत संबंधित कृषी सेवा केंद्रात तीन दिवस शेतकऱ्याच्या नावावर राखीव ठेवले जाईल. या कालावधीत शेतकऱ्याने QR कोड स्कॅन करून खताची उचल करावी लागेल.
गैरवापराला बसणार आळा
या प्रणालीमुळे अनुदानित खतांचे समन्यायी वाटप होण्यास मदत होणार असून खतांच्या गैरवापरावर नियंत्रण ठेवणे शक्य होणार आहे. तसेच शेतकऱ्यांना रांगेत उभे राहण्याची गरज भासणार नाही.
प्रशिक्षण व जनजागृती मोहीम
या नवीन प्रणालीच्या अंमलबजावणीसाठी कृषी विभागाचे अधिकारी, कर्मचारी आणि कृषी सेवा केंद्र चालकांचे प्रशिक्षण पूर्ण करण्यात आले आहे. तसेच शेतकऱ्यांपर्यंत माहिती पोहोचविण्यासाठी व्यापक जनजागृती मोहीम राबविण्यात येत आहे.
शेतकऱ्यांच्या मदतीसाठी सर्व तालुक्यांतील पंचायत समिती व तालुका कृषी अधिकारी कार्यालयांमध्ये विशेष अधिकारी नियुक्त करण्यात आले आहेत. अधिक माहितीसाठी शेतकरी आपल्या गावातील सहाय्यक कृषी अधिकारी किंवा संबंधित कृषी विभागाशी संपर्क साधू शकतात.
शेतकऱ्यांनी मोबाईल ॲप डाउनलोड करून त्याद्वारेच अनुदानित खताची बुकिंग व खरेदी करावी, असे आवाहन कृषी विकास अधिकारी व जिल्हा अधीक्षक कृषी अधिकारी, छत्रपती संभाजीनगर यांनी केले.
