छत्रपती संभाजीनगर महानगरपालिकेने १ जून २०२६ पासून शहरातील सर्व १० झोनमध्ये डेंग्यू, मलेरिया, चिकनगुनिया व इतर डासजन्य आजारांच्या प्रतिबंधासाठी व्यापक अबेट मोहीम सुरू केली आहे. महापौर श्री. समीर राजुरकर व आयुक्त श्री. अमोल येडगे यांच्या मार्गदर्शनाखाली आरोग्य विभागाच्या पथकांकडून घरभेटी, कंटेनर सर्वेक्षण, अबेट औषध फवारणी, ताप सर्वेक्षण व जनजागृती उपक्रम राबविले जात आहेत.
नागरिकांनी कुलर, फुलदाण्या, पाण्याच्या टाक्या व इतर पाणी साठवणाऱ्या ठिकाणांची नियमित स्वच्छता ठेवावी, आठवड्यातून एकदा पाणी बदलावे आणि डासांची उत्पत्ती रोखण्यासाठी सहकार्य करावे, असे आवाहन महापालिकेच्या आरोग्य विभागाने केले आहे. शहराला डेंग्यू-मलेरियामुक्त ठेवण्यासाठी नागरिकांच्या सक्रिय सहभागावर भर देण्यात आला आहे.
