‘एक्स्प्रेस लोन’च्या नावाखाली खासगी सावकारांचा सुळसुळाट; सर्वसामान्यांची आर्थिक पिळवणूक सुरू

छत्रपती संभाजीनगर | प्रतिनिधी
राज्यात अनेक ठिकाणी खासगी सावकारांचा उच्छाद वाढत असून ‘एक्स्प्रेस लोन’च्या नावाखाली सर्वसामान्य नागरिकांची आर्थिक पिळवणूक होत असल्याचे चित्र आहे. तातडीच्या आर्थिक गरजेचा फायदा घेत काही सावकार ठराविक कालावधीसाठी लोकांना व्याजाने पैसे देतात. मात्र कर्ज देतानाच पहिल्या महिन्याचे व्याज कापून उर्वरित रक्कम कर्जदारांच्या हातात दिली जाते.
धक्कादायक बाब म्हणजे या कर्जावर दरमहा दरशेकडा १७ ते ३० टक्क्यांपर्यंत व्याज आकारले जात असल्याची माहिती समोर येत आहे. त्यामुळे अल्प कालावधीतच कर्जदारांवर मोठा आर्थिक बोजा निर्माण होतो. कर्ज फेडण्यासाठी अनेकांना पुन्हा कर्ज घ्यावे लागत असून ते कर्जाच्या दुष्टचक्रात अडकत आहेत.
विशेष म्हणजे, सावकार दररोज संध्याकाळी स्कुटीवर फिरून कर्जदारांकडून हप्त्यांची वसुली करतात. ही पद्धत एखाद्या बँकिंग कर्मचाऱ्याच्या वसुलीसारखीच असली तरी ती कोणत्याही अधिकृत आर्थिक संस्थेच्या नियंत्रणाखाली नसल्याचे दिसून येते.
नागरिकांमध्ये भीतीचे वातावरण निर्माण झाले असून अनेकजण सामाजिक प्रतिष्ठेच्या भीतीने किंवा दबावामुळे तक्रार करण्यासही धजावत नाहीत. त्यामुळे अशा सावकारी व्यवहारांवर नियंत्रण ठेवण्यासाठी प्रशासनाने विशेष मोहीम राबवून चौकशी करावी, अशी मागणी नागरिकांतून होत आहे.
उपशीर्षक :
कर्ज देताना पहिल्याच महिन्याचे व्याज कापले जाते; दरमहा १७ ते ३० टक्के व्याजदराने सर्वसामान्यांची आर्थिक कोंडी
संपादकीय प्रश्न
राज्यातील बेकायदेशीर सावकारीवर प्रशासनाचे नियंत्रण नेमके कुठे आहे?
सामान्य नागरिकांची होत असलेली आर्थिक लूट थांबवण्यासाठी कठोर कारवाईची गरज असल्याचे मत नागरिक व्यक्त करत आहेत.