स्वातंत्र्यवीर सावरकर १४३ वी जयंती मोठ्या उत्साहात साजरी होणार

२८ मे रोजी छत्रपती संभाजीनगरात विविध कार्यक्रमांचे आयोजन
छत्रपती संभाजीनगर : स्वातंत्र्यवीर सावरकर १४३ वी जयंती महोत्सव समिती, छत्रपती संभाजीनगर यांच्या वतीने २८ मे रोजी शहरात विविध कार्यक्रमांचे आयोजन करण्यात आले असून जयंती मोठ्या उत्साहात साजरी करण्यात येणार आहे.
क्रांतिकारकांचे मुकुटमणी, साहित्यिक, महाकवी, स्वातंत्र्यवीर, मानवतावादी, प्रखर विचारवंत, राष्ट्रीय अस्मितेचे उद्गाते, स्वदेशीचे पुरस्कर्ते, परिवर्तनाचे प्रवर्तक आणि आधुनिक भारताचे शिल्पकार म्हणून ओळख असलेल्या स्वातंत्र्यवीर सावरकरांना अभिवादन करण्यासाठी विविध उपक्रम राबविण्यात येणार आहेत.
कार्यक्रमाची सुरुवात सकाळी ८ वाजता समर्थ नगर येथील स्वातंत्र्यवीर सावरकर यांच्या पुतळ्यास अभिवादन करून होणार आहे. सकाळी ८ ते ११.३० या वेळेत विविध संस्था, संघटना, राजकीय पक्ष तसेच सामाजिक संघटनांच्या वतीने अभिवादन करण्यात येणार आहे.
यावेळी सकाळी ९ वाजता स्वर्गीय दत्ताजी भाले रक्त केंद्र यांच्या सहकार्याने भव्य रक्तदान शिबिराचे आयोजन करण्यात आले आहे. हे शिबिर स्वातंत्र्यवीर सावरकर पुतळा, समर्थ नगर येथे होणार आहे.
तसेच परशुराम चौक, संभाजी पेठ, सावरकर चौक सिडको, त्रिमूर्ती चौक, जव्हार कॉलनी, पदमपुरा, छावणी, अविष्कार कॉलनी, चिकलठाणा, बेगमपुरा, पहाडसिंगपुरा, ज्योती नगर, सातारा परिसर, छत्रपती नगर, देवळाली चौक, रामनगर, जय भवानीनगर आदी शहरातील विविध चौकांमध्ये सावरकर जयंती साजरी करण्यात येणार आहे.
सायंकाळी ६ ते ७ या वेळेत योगासन स्पर्धा, तर सायंकाळी ७ ते ८ या वेळेत “वादळ तेजाचे – सावरकरांच्या साहित्याचे अभिवाचन” हा कार्यक्रम आयोजित करण्यात आला आहे.
यानंतर सायंकाळी ८ ते ९.३० या वेळेत प्रख्यात गायक-संगीतकार प्रमुख सरकटे यांच्या उपस्थितीत “देशभक्ती आणि सावरकर गीतांचा स्वराज – वंदेमातरम” हा विशेष सांगीतिक कार्यक्रम होणार आहे. हा कार्यक्रम गोविंदभाई श्राफ सभागृह, सरस्वती भुवन प्रांगण, संभाजी पेठ बस स्थानकाजवळ येथे आयोजित करण्यात आला आहे.
रात्री ८.३० वाजता समर्थ नगर येथील स्वातंत्र्यवीर सावरकरांच्या पुतळ्यासमोर १४३ दिवे प्रज्वलित करून दीपोत्सवाद्वारे अभिवादन करण्यात येणार आहे.
वरील सर्व कार्यक्रमांना नागरिकांनी मोठ्या संख्येने उपस्थित राहावे, असे आवाहन स्वातंत्र्यवीर सावरकर १४३ वी जयंती महोत्सव समितीच्या वतीने करण्यात आले आहे.
जयंती महोत्सवाचे अध्यक्ष जालिंदर शेंडगे असून निमंत्रक भाऊ सुरडकर आहेत. तसेच प्रदीप बुरांडे, किशोर मानकापे, आनंद तांदूळवाडीकर, प्रमोद सरकटे, सुधीर नाईक, गोविंद कुलकर्णी, सुभाष कुमावत, किरण सराफ, विजय जहागीरदार, सुहास ठोसर, राजेश मेहता, अभिषेक कादी, संजय मांडे, सचिन गुळवे, गोपाल कुलकर्णी, दिगंबर मोरे, जगदीश हर्सुलकर, योगेश वाणी, गजानन पिंपळे, विजया कुलकर्णी, क्रांती देशमुख, साधना सुरडकर, गीता आचार्य, संध्या कापसे, विजया अवस्थी, सुनीता देव, स्मिता जोशी आदींनी संयोजन केले आहे.