छत्रपती संभाजीनगर : महानगरपालिकेच्या ‘माझा कर, माझी जबाबदारी’ या विशेष मोहिमेला नागरिकांकडून उत्स्फूर्त प्रतिसाद मिळत असून, झोन ८ आणि झोन १० मध्ये अवघ्या तीन दिवसांत तब्बल १,०३२ नवीन मालमत्तांना कर आकारणी करण्यात आली आहे.
शहरातील करजाळ्याबाहेर असलेल्या मालमत्तांचा शोध घेऊन त्यांना मालमत्ता कराच्या कक्षेत आणण्यासाठी महानगरपालिकेतर्फे ही मोहीम राबविण्यात येत आहे. मा. महापौर समीर राजूरकर, मा. उपमहापौर राजेंद्र जंजाळ, मा. सभापती अनिल मकरिये, मा. विरोधी पक्षनेते अब्दुल समीर साजिद यांच्या सूचनेनुसार तसेच मा. आयुक्त अमोल येडगे यांच्या आदेशानुसार ही मोहीम सुरू करण्यात आली आहे. अतिरिक्त आयुक्त कल्पिता पिंपळे यांच्या मार्गदर्शनाखाली अधिकारी आणि कर्मचारी प्रत्यक्ष क्षेत्रात जाऊन तपासणी व नोंदणीचे काम करत आहेत.
२० मे ते २२ मे दरम्यान सातारा-देवळाई (झोन ८) आणि कांचनवाडी-नक्षत्रवाडी (झोन १०) परिसरात विशेष मोहीम राबविण्यात आली. या मोहिमेदरम्यान नव्या मालमत्तांची तपासणी, नोंदणी आणि कर आकारणीची प्रक्रिया पूर्ण करण्यात आली. केवळ तीन दिवसांत १,०३२ नवीन मालमत्तांना कर आकारणी करण्यात यश मिळाल्याने प्रशासनाकडून समाधान व्यक्त करण्यात आले आहे.
महानगरपालिकेच्या माहितीनुसार, ‘माझा कर, माझी जबाबदारी’ या मोहिमेअंतर्गत आतापर्यंत ३ हजारांहून अधिक मालमत्तांना करजाळ्यात आणण्यात आले आहे. त्यामुळे महानगरपालिकेच्या महसुलात वाढ होण्यास मदत होणार असून, मालमत्ता कर प्रणाली अधिक पारदर्शक आणि प्रभावी बनत असल्याचे प्रशासनाने स्पष्ट केले.
या मोहिमेत झोन ८ मधील तांत्रिक कर्मचारी कुणाल भोसले यांच्यासह प्राप्ती जाधव, कृष्णा ठोकळ आणि गणेश वीर यांनी प्रत्यक्ष क्षेत्रात काम पाहिले. तर झोन १० मध्ये मुकेश खडसे, संतोष वाचासुंदर, शिवम घोडके आणि आसिफ शेख यांनी कर आकारणीची जबाबदारी पार पाडली. मोहिमेचे नियोजन झोन ८ चे सहायक आयुक्त भरत बिरारे आणि झोन १० च्या सहायक आयुक्त अर्चना राजपूत यांनी केले.
महानगरपालिकेकडून ही विशेष मोहीम पुढील आठवड्यातही सुरू ठेवण्यात येणार असून, शहरातील सर्व मालमत्ता धारकांनी स्वतःहून मालमत्ता कर आकारणी करून घ्यावी आणि उपलब्ध १० टक्के सवलतीचा लाभ घ्यावा, असे आवाहन प्रशासनाने केले आहे.
करजाळ्यात नव्या मालमत्तांचा समावेश; अवघ्या तीन दिवसांत १,०३२ मालमत्तांना कर आकारणी
