मनपा, दि. 20 मे : महाराष्ट्र न्यूज टाइम्स प्रतिनिधी
छत्रपती संभाजीनगर महानगरपालिका आयुक्त अमोल येडगे यांच्या आदेशानुसार तसेच अतिक्रमण नियंत्रण अधिकारी संतोष वाहुळे आणि उपआयुक्त सविता सोनवणे यांच्या मार्गदर्शनाखाली आज मोतीवाला कॉलनी, चिखलठाणा येथील सुखना नदीच्या काठावरील अतिक्रमणांवर महानगरपालिकेने मोठी कारवाई केली. नदीकाठावरील अतिक्रमणे हटविणे ही केवळ प्रशासकीय कारवाई नसून नदीचे अस्तित्व, पर्यावरणीय समतोल आणि नागरिकांच्या सुरक्षेच्या दृष्टीने अत्यंत महत्त्वाची बाब असल्याचे यावेळी अधोरेखित करण्यात आले.
सुखना नदी ही शहराच्या नैसर्गिक जलनिस्सारण व्यवस्थेचा महत्त्वाचा भाग असून नदीपात्र आणि नदीकाठावरील अतिक्रमणांमुळे पावसाळ्यात पाण्याचा प्रवाह बाधित होऊन पूरस्थिती निर्माण होण्याचा धोका वाढतो. तसेच नदीकिनारी अनधिकृत बांधकामांमध्ये वास्तव्यास राहणे हे नागरिकांच्या जीवितास गंभीर धोका निर्माण करणारे ठरू शकते. मुसळधार पावसाच्या काळात नदीच्या पाण्याची पातळी अचानक वाढल्यास जीवित व मालमत्तेची हानी होण्याची शक्यता नाकारता येत नाही. त्यामुळे नदीकाठ अतिक्रमणमुक्त ठेवणे ही काळाची गरज असल्याचे महानगरपालिकेने स्पष्ट केले.
सुखना नदीच्या काठावरील अतिक्रमण धारकांना बांधकाम काढून घेण्याबाबत महानगरपालिकेकडून वेळोवेळी सूचना देण्यात आल्या होत्या. या कारवाईत एकूण 32 अतिक्रमण धारकांचा समावेश होता. त्यापैकी काही नागरिकांनी स्वतःहून अतिक्रमण हटविले, तर उर्वरित 25 अतिक्रमण धारकांची बांधकामे महानगरपालिकेकडून निष्कासित करण्यात आली. या कारवाईमध्ये नदीकाठावर उभारण्यात आलेल्या दोन मजली जिमच्या बांधकामाचाही समावेश होता.
नदीपात्र आणि नदीकाठावरील अतिक्रमणे हटवून नैसर्गिक प्रवाह सुरळीत ठेवणे, पूराचा धोका कमी करणे आणि नागरिकांच्या सुरक्षेला प्राधान्य देणे या उद्देशाने महानगरपालिका अशा कारवाया पुढेही सातत्याने करणार असल्याचे प्रशासनाने सांगितले.
सदर कारवाईसाठी झोन क्रमांक 6 चे पदनिर्देशित अधिकारी निलेश पाटणी, इमारत निरीक्षक गणेश वीर, देसाई, सागर तसेच अतिक्रमण विभागाच्या कर्मचाऱ्यांनी सहभाग घेत कार्यवाही यशस्वीपणे पार पाडली.
