छत्रपती संभाजीनगर (प्रतिनिधी) – परमसदगुरू श्रीगजानन महाराज यांच्या जन्मोत्सवानिमित्त ‘गुरुमंदिर व विश्व फाउंडेशन, विश्वपुरी अक्कलकोट’ यांच्या संयुक्त विद्यमाने क्रांती चौक येथे आयोजित करण्यात आलेला सामूहिक अग्निहोत्र कार्यक्रम अत्यंत भक्तीमय आणि उत्साहपूर्ण वातावरणात संपन्न झाला. या कार्यक्रमाला शहरातील विविध भागांतून मोठ्या संख्येने नागरिक, साधक व स्वयंसेवक उपस्थित होते.
सायंकाळी अचूक ६:५४ वाजता सूर्यास्ताच्या क्षणी सामूहिक अग्निहोत्र विधी पार पडला. यावेळी उपस्थित साधकांनी वैदिक मंत्रोच्चारात अग्निहोत्र करून वातावरण भक्तिमय केले. कार्यक्रमाच्या माध्यमातून नागरिकांना अग्निहोत्राचे आध्यात्मिक, वैज्ञानिक व पर्यावरणपूरक महत्त्व समजावून सांगण्यात आले.
अग्निहोत्रामुळे वातावरण शुद्ध होण्यास, मानसिक शांतता लाभण्यास तसेच प्रदूषण कमी होण्यास मदत होत असल्याचे मार्गदर्शन यावेळी करण्यात आले. उपस्थित नागरिकांनी या उपक्रमाचे कौतुक करत मोठ्या प्रमाणात सकारात्मक प्रतिक्रिया दिल्या. अनेकांनी भविष्यात नियमितपणे अग्निहोत्र करण्याची इच्छाही व्यक्त केली.
कार्यक्रमात अग्निहोत्राचे प्रत्यक्ष प्रात्यक्षिक दाखवण्यात आले तसेच सूर्योदय आणि सूर्यास्ताच्या अचूक वेळी अग्निहोत्र कसे करावे, याविषयी सविस्तर माहिती देण्यात आली. जगातील अनेक देशांमध्ये अग्निहोत्राचे आचरण होत असल्याची माहिती आयोजकांनी दिली.
या उपक्रमासाठी शहरातील नागरिक, स्वयंसेवक आणि माध्यम प्रतिनिधींनी दिलेल्या सहकार्याबद्दल आयोजकांनी आभार व्यक्त केले.
