छत्रपती संभाजीनगर (महाराष्ट्र न्यूज टाइम्स) – पनीर आणि चीज ॲनालॉग हे दोन वेगवेगळे अन्नपदार्थ असून त्यांच्या पोषणमूल्यात मोठा फरक आहे. ग्राहकांना याची स्पष्ट माहिती मिळावी यासाठी हॉटेल, रेस्टॉरंट, केटरर्स व फास्टफूड विक्रेत्यांनी आपल्या मेन्यू कार्ड व इलेक्ट्रॉनिक डिस्प्लेवर “चीज ॲनालॉग” असा स्पष्ट उल्लेख करणे आता बंधनकारक करण्यात आले आहे. नियमांचे पालन न करणाऱ्यांवर कठोर कारवाई करण्याचे निर्देश जिल्हाधिकारी विनय गौडा जी.सी. यांनी अन्न व औषध प्रशासनाला दिले आहेत.
अन्न व औषध प्रशासन विभागाचे आयुक्त श्रीधर डुबे पाटील यांनी दिलेल्या माहितीनुसार, अनेक ठिकाणी पनीरऐवजी चीज ॲनालॉगचा वापर केला जातो. मात्र पनीर हे दुधापासून तयार केले जाते, तर चीज ॲनालॉग हा खाद्यतेल, स्टार्च आणि विविध फूड ॲडिटीव्ह वापरून बनविला जातो. त्यामुळे दोन्ही पदार्थांचे पोषणमूल्य वेगळे असते.
अन्न सुरक्षा व मानके अधिनियम २००६ तसेच नियम व नियमने २०११ नुसार चीज ॲनालॉगच्या उत्पादन किंवा विक्रीवर बंदी नसली, तरी ग्राहकांना ते काय खात आहेत याची योग्य माहिती मिळणे आवश्यक आहे. याच पार्श्वभूमीवर अन्न सुरक्षा व मानके नियम २०२० नुसार संबंधित पदार्थातील घटकांची माहिती स्पष्टपणे प्रदर्शित करणे बंधनकारक करण्यात आले आहे.
दि. १ मेपासून हॉटेल्स, रेस्टॉरंट्स, केटरर्स आणि इतर अन्न व्यावसायिकांची तपासणी सुरू करण्यात येणार असून, नियमांचे उल्लंघन करणाऱ्यांवर सह आयुक्त (अन्न) यांच्या पथकाकडून कारवाई करण्यात येणार आहे.
दरम्यान, पनीर आणि चीज ॲनालॉग यातील फरकाबाबत ग्राहकांमध्ये जनजागृती करण्याचे आवाहन प्रशासनाने केले आहे.
छत्रपती संभाजीनगर; पनीर की चीज ॲनालॉग? मेन्यू कार्डवर स्पष्ट उल्लेख बंधनकारक
