(महाराष्ट्र न्यूज टाइम्स)
मुंबई शहर येथे संपन्न झालेल्या ३६ व्या महाराष्ट्र राज्य पोलीस क्रीडा स्पर्धेत छत्रपती संभाजीनगर शहर, छत्रपती संभाजीनगर आणि नांदेड परिक्षेत्राच्या संघाने आपल्या पराक्रमाची पराकाष्ठा करत एकूण ४७ पदके पटकावून राज्याच्या पोलीस दलात विभागाचा दबदबा निर्माण केला आहे. या ऐतिहासिक यशाबद्दल आज पोलीस मुख्यालय येथे एका दिमाखदार सोहळ्यात पदकविजेत्या खेळाडूंचा विशेष पोलीस महानिरीक्षक मा. श्री. वीरेंद्र मिश्र यांच्या हस्ते गौरव करण्यात आला.
यशाची आकडेवारी आणि प्रगती
२० ते २७ एप्रिल २०२६ दरम्यान मुंबईत पार पडलेल्या या स्पर्धेत परिक्षेत्राच्या २४४ जणांच्या चमूने (१५२ पुरुष, ७४ महिला खेळाडू व १८ प्रशिक्षक) सहभाग घेतला होता. या संघाने:
• ०७ सुवर्ण (Gold)
• ०९ रौप्य (Silver)
• ३१ कांस्य (Bronze)
अशी एकूण ४७ पदके पटकावून मागील वर्षीच्या तुलनेत पदकांच्या संख्येत १९ ने वाढ केली आहे. बास्केटबॉल आणि व्हॉलीबॉल यांसारख्या सांघिक खेळांमध्येही खेळाडूंनी पदकांची कमाई करत आपले कौशल्य सिद्ध केले.
सत्कार समारंभात खेळाडूंना संबोधित करताना विशेष पोलीस महानिरीक्षक मा. श्री. वीरेंद्र मिश्र म्हणाले की, “मैदानावरील हा विजय केवळ पदकांचा नाही, तर तो तुमच्या अदम्य इच्छाशक्तीचा आणि परिश्रमाचा विजय आहे. पोलीस गणवेशातील तुमचा हा लढाऊ बाणा पाहून मला सार्थ अभिमान वाटतो. खेळ तुम्हाला केवळ शारीरिक तंदुरुस्ती देत नाही, तर संकटात स्थिर राहण्याचे मानसिक धैर्य देतो. आजची ही ४७ पदके केवळ सुरुवात आहे; भविष्यात तुम्ही राज्याच्या नकाशावर छत्रपती संभाजीनगर परिक्षेत्राला अव्वल स्थानी नेऊन ठेवाल, विश्वास आहे.”
पोलीस अधीक्षक मा. डॉ. विनयकुमार राठोड आणि अपर पोलीस अधीक्षक मा. श्रीमती अन्नपूर्णा सिंह यांच्या मार्गदर्शनाखाली ०९ मार्च ते १८ एप्रिल दरम्यान राबवण्यात आलेले विशेष सराव शिबिर या यशाचा पाया ठरले. याप्रसंगी पोलीस उपायुक्त (शहर) मा. श्रीमती शर्मिष्ठा वालावलंकर, मा. श्रीमती आरती पवार आणि प्र. पोलीस उपअधीक्षक मा. श्री. विनय सोनवणे यांची प्रमुख उपस्थिती होती.
यावेळी खेळाडूंची कामगिरी उंचावण्यासाठी आयरनमॅन श्री. नितीन घोरपडे (क्रीडा मानसोपचार तज्ज्ञ) आणि आहारतज्ज्ञांचे विशेष सत्र आयोजित करण्यात आले होते. या नाविन्यपूर्ण उपक्रमामुळे खेळाडूंचे मानसिक मनोबल वाढण्यास मदत झाली. तसेच डॉ. क्षीरसागर आणि डॉ. अश्विनी धांडे यांच्या फिजिओथेरपी सुविधेमुळे खेळाडू दुखापतमुक्त राहिले. उपविभागीय पोलीस अधिकारी (सिल्लोड) श्री. दिनेश कोल्हे यांनी विशेषतः खेळाडूंना उत्कृष्ट कामगिरीसाठी वेळोवेळी प्रोत्साहित केले.
स्पर्धेचे संपूर्ण नियोजन स्पोर्ट्स इंचार्ज निहालसिंग डेहगल, होम डीवायएसपी राजेंद्र बनसोडे, आरपीआय अण्णासाहेब वाघमोडे, आरपीएसआय विजय मुंडे आणि पोनि (वेल्फेअर) प्रशांत महाजन यांनी वरिष्ठ अधिकाऱ्यांच्या देखरेखीखाली अत्यंत प्रभावीपणे पार पाडले.
