36 मीटर उंचीच्या अत्याधुनिक मल्टी आर्टिक्युलेटिंग वॉटर टॉवर प्राप्त; अग्निशमन सेवेत मोठी झेप.

छत्रपती संभाजीनगर,(महाराष्ट्र न्यूज टाइम्स प्रतिनिधी)
शहरातील वाढत्या बहुमजली इमारतींच्या पार्श्वभूमीवर अग्निशमन यंत्रणा अधिक सक्षम व आधुनिक करण्याच्या दृष्टीने छत्रपती संभाजीनगर महानगरपालिकेने महत्त्वपूर्ण पाऊल उचलले आहे. जिल्हा नियोजन समितीमार्फत प्राप्त निधीतून 36 मीटर उंचीच्या अत्याधुनिक मल्टी आर्टिक्युलेटिंग वॉटर टॉवर सेट मशीनरीची खरेदी करण्यात आली आहे.
महानगरपालिकेकडे यापूर्वी बहुमजली इमारतींमध्ये आग लागल्यास प्रभावीपणे नियंत्रण मिळविण्यासाठी आवश्यक आधुनिक यंत्रणा उपलब्ध नव्हती. ही गरज ओळखून मा. पालकमंत्री श्री संजय शिरसाट यांच्या पुढाकाराने जिल्हा नियोजन समितीमार्फत सुमारे रु. 15.78 कोटींचा निधी उपलब्ध करून देण्यात आला. या निधीतून अत्याधुनिक तंत्रज्ञानयुक्त मल्टी आर्टिक्युलेटिंग वॉटर टॉवर सेट खरेदी करण्यात आला आहे.
या संचामध्ये 36 मीटर उंचीचा वॉटर टॉवर, 14,000 लिटर क्षमतेचा वॉटर बाउजर आणि अग्निशमनासाठी उपयोगी रोबोटचा समावेश आहे. ही यंत्रणा जर्मन तंत्रज्ञानावर आधारित असून “स्विंग” या नामांकित जर्मन कंपनीची आहे. भारतातील अधिकृत प्रतिनिधी मे. निधी एंटरप्रायझेस, मुंबई यांच्या मार्फत या मशीनरीचा पुरवठा करण्यात आला आहे.
ही अत्याधुनिक यंत्रणा 10 ते 12 मजली इमारतींमध्ये लागलेल्या आगीवर प्रभावी नियंत्रण मिळविण्यास सक्षम ठरणार आहे. वॉटर टॉवरच्या बूमवर बसविण्यात आलेल्या मॉनिटरिंग कॅमेरा व फायबर ऑप्टिक प्रणालीद्वारे आगीचे अचूक निरीक्षण करता येते. तसेच थर्मल कॅमेऱ्याच्या सहाय्याने वाहनाच्या कंट्रोल पॅनेलमधून ऑपरेटरला तळमजल्यापासूनच आगीवर नियंत्रण मिळविता येणार असून, यामुळे अग्निशमन कर्मचाऱ्यांना प्रत्यक्ष आगीजवळ जाण्याचा धोका टाळता येणार आहे.
यंत्रणेमध्ये असलेल्या रोबोटच्या साहाय्याने आग विझविण्याचे काम अधिक सुरक्षित आणि जलदगतीने पार पाडता येणार आहे. बाउजरद्वारे सतत पाणीपुरवठा सुनिश्चित केला जात असल्याने आग विझविण्याची कार्यक्षमता अधिक वाढणार आहे.
सदरची यंत्रणा नुकतीच महानगरपालिकेला प्राप्त झाली असून, लोकार्पणानंतर संबंधित कर्मचाऱ्यांना आवश्यक प्रशिक्षण दिल्यानंतर या मशीनरीचा प्रत्यक्ष वापर सुरू करण्यात येणार आहे. या नव्या यंत्रणेच्या समावेशामुळे शहरातील अग्निशमन सेवा अधिक सक्षम, सुरक्षित आणि परिणामकारक होणार असल्याचा विश्वास प्रशासनाने व्यक्त केला आहे.