आंबेडकर जयंती मिरवणूक सुरळीत व्हावी ,भाविकांना त्रास होऊ नये – महापौरांचे निर्देश

छत्रपती संभाजीनगर,( महाराष्ट्र न्यूज टाईम प्रतिनिधी)दि. 10 एप्रिल:
महामानव डॉ. बाबासाहेब आंबेडकर जयंतीनिमित्त १४ एप्रिल रोजी निघणाऱ्या मिरवणुकीदरम्यान भाविकांना कोणत्याही प्रकारचा त्रास होणार नाही, यासाठी सर्व संबंधित यंत्रणांनी आवश्यक ती खबरदारी घ्यावी, असे निर्देश महापौर श्री. समीर राजूरकर यांनी दिले.
आंबेडकर जयंती मिरवणुकीच्या पार्श्वभूमीवर महानगरपालिकेतर्फे पुरविण्यात येणाऱ्या सोयी-सुविधांचा आढावा घेण्यासाठी आयोजित बैठकीत ते बोलत होते.
या बैठकीस उपमहापौर श्री. राजेंद्र जंजाळ, स्थायी समिती सभापती श्री. अनिल मकरीये, आयुक्त श्री. अमोल येडगे, अतिरिक्त आयुक्त श्री. रणजीत पाटील, सौ. कल्पिता पिंपळे, शहर अभियंता श्री. संजय कोंबडे, कार्यकारी अभियंता (यांत्रिकी) श्री. अमोल कुलकर्णी, सौ. मोहिनी गायकवाड, श्री. विजय गोरे तसेच सर्व सहाय्यक आयुक्त व वॉर्ड अभियंते उपस्थित होते.
महापौरांनी निर्देश देताना सांगितले की, मिरवणूक मार्गावरील सर्व खड्डे तात्काळ बुजविण्यात यावेत. तसेच उघडे ढापे बंद करून पथदिवे सुरळीत सुरू राहतील आणि मिरवणूक मार्गावरील स्वच्छता राहतील याची खात्री करावी.
सदर मिरवणूक क्रांती चौक – पैठण गेट – सिटी चौक – पोस्ट ऑफिस मार्गे भडकल गेटपर्यंत काढण्यात येणार आहे. या संपूर्ण मार्गाची महानगरपालिका, पोलीस प्रशासन, महावितरण आणि सार्वजनिक बांधकाम विभागांनी संयुक्त पाहणी करून जयंतीच्या एक दिवस आधी सर्व अडथळे दूर करावेत, असेही त्यांनी सांगितले.
मिरवणूक मार्गावर पिण्याच्या पाण्याची व्यवस्था, मोबाईल टॉयलेट्स आदी सुविधा उपलब्ध करून देण्याच्या सूचनाही महापौरांनी दिल्या.
याशिवाय, दरवर्षी प्रमाणे भडकल गेट येथे स्टेज आणि पुतळ्याची व्यवस्था सार्वजनिक बांधकाम विभागानी करावी आणि विद्युत रोषणाई, म्युझिक सिस्टम आणि सुशोभीकरण महानगरपालिकेने करावा, ते म्हणाले.
उपमहापौरांनी निर्देश दिले की, मिरवणुकीच्या स्वागतासाठी उभारण्यात येणाऱ्या स्टेज दिलेल्या परवानगीनुसारच बांधलेले आहे का, याची संबंधित अधिकाऱ्यांनी प्रत्यक्ष पाहणी करून खात्री करावी. नियोजित जागेपेक्षा अधिक जागा व्यापल्यास मिरवणुकीस अडथळा निर्माण होऊ शकतो, याकडे त्यांनी लक्ष वेधले.
स्थायी समिती सभापती यांनी मिरवणूक मार्गावर तसेच भडकल गेट येथे ॲम्बुलन्स व डॉक्टरांची व्यवस्था ठेवण्याची सूचना केली.
आयुक्त श्री. अमोल येडगे यांनी मुख्य कार्यक्रम स्थळी उभारण्यात येणाऱ्या स्टेजची क्षमता आणि भाविकांची सुरक्षा लक्षात घेऊन नियोजन करण्याचे निर्देश दिले.